Mizoram sorkar in buh thar tam kum a puan bawhzuina kal zelah tun thla ni 23 atang khan Serchhip-a Agriculture Department chuan nithum chhung awh tur natna hrik laka Buh ven dan training a buatsaih a, he training hi Vawiin khan Field Visit neiin zawhfel a ni.

He Training hi FIAC, Agriculture Complex, Serchhip-ah neih  niin a nikhatna ah hian Theory in zirtirna hi neih a ni a, Pu C. Lalnithanga, APPO (Assistant Plant Protection Officer) Aizawl in zirtirna pein he training ah hian Field Staff leh WDT mi 20 an tel a ni. Nimin (24th August) khan Field Visit neiin Thuhruk leh Serchhip Zawlpui zau a leilet hrang hrangte tlawhkual a ni a, Vawiin khan Chekawn leh North Vanlaiphai-a leilet te tlawh lehin leilet hrang hranga Buh hi natna hrik te hian an bei tan tih he hunah hian hmuhchhuah a ni a, Leilet neitute chu Agriculture Department Office-ah buh beitu rannung venna hlo la turin an hriattir nghal bawk. Nikum 2010 khan Serchhip District-ah hian buhfai quintal 63900 thar  niin kumin a buh thar tam kumah hian quintal 1,11,255 thar theih beisei a ni.

Serchhip District-ah hian ram hectare 336-a zau ah mi 554 in SRI in buh an ching a, Improved Method in mi 336 in ram hectare 254 a zau ah buh an ching bawk a, hei hi Serchhip District puma leilet za zela 89 a tling phak a ni. Kumin ah hian Buh tam zawk tharchhuah anih theih nan Serchhip District-ah hian fertilizers chi hrang hrang quintal 1464 leia pekchhuah a ni tawh a, hei bakah hian weedicides, hnim thlawhna hlo litres 1400 zet pekchhuah a ni tawh bawk. Leilet buh chinna hmuna buh te rannung in an tihchhiat tur venna atan hian rannung kahna tur Sprayer chu Serchhip District-ah hian 86 sem tura ruahman a ni a, Vawiin a field visit an neihna ah hian Chekawn-a FMC hruaitute hnenah DAO, Pu Lalthansiama chuan Sprayer 3 hlan nghalin North Vanlaiphai-a FMC hruaitute hnenah Sprayer 4 a hlan nghal bawk a ni.