Vawiin chawhnu dar 2:00 khan Pu Kunal IAS, District Bawrhsap chuan Saiha-a chanchinthar thehdarhtu te a Office Chamber-ah a kawm.

He Press Meet hi ruahman lawk anga thlatin a neih thin tur a nih thu sawiin Pu Kunal IAS chuan Saiha District chhung dinhmun leh harsatna tawh hrang hrangte a sawi a, Saiha District chhunga sawrkar hmalakna hrang hrang te leh a hmachhawp mek te a sawi a, NLUP sum sem anih tawh dan pawh a tarlang bawk, ei leh bar kawng ah harsatna em em a awm loh thu sawiin tun dinhmunah buhfai chhekkhawl tam lo mahse mipuite eitur a awm reng thu a sawi a, tunhnai khawchhia in district chhung inkalpawhna hmun thenkhat tichhe mahse a thenfai hna chak taka kalpui anih thu a sawi bawk.

Chanchinthar thehdarhtute pawhin district chhung administration chungchanga an ngaihmawh leh tul an tih hrang hrang te he meetingah hian District Bawrhsap hnenah hian an sawi a, khawpui chhung kawng chep lutuk tih ziaawm nana kawngpui sirah insakna leh dawr bungrua te dah lo tura zirtirna te an chanchinbu ah ziak tam tur leh District Magistrate thupek zawm kawngah chanchinbu mite tan la leh zuala chanchinbu ah tarlang tam turin Bawrhsap hian a ngen hlawm ani. Saiha khawpui chhung kalkawng dala Telephone line te pawh siam that anih theih nan thuneitute hnenah D.C. hian thlen a tum thu a sawi bawk. Ran khuahkhirh chungchangah Ui chauh nilova Ar pawh khuahkhirh a tul thu an sawi pawh hmalak a tum thu a sawi bawk. Zu leh ruihtheih thil dang dang te pawh a khuahkhirh kawngah nasa zawk a hmalak a tul thu chanchinbu mite hian an sawi ani. He meetingah hian tualchhung chanchinbu mite, DDK News correspondence te bakah Local Cable TV neitu te an tel kim hle a ni.

Attachment

  • Loading attachment...