Kumin 2011 hi Teachers’ Day Golden Jubilee a nih angin rampumah uar taka hman tum a ni a. Mizoramah pawh school leh zirna in tinah Zirtirtute Ni hi urhsun tak leh hlimawm thei ang bera hman a ni dawn.

August ni 22, 2011 khan Aizawl D.C. Pu Shurbir Singh kaihhruaina hnuaiah State Level Committee - Aizawl South-I MLA Lt.Col.Z.S. Zuala leh Education Department hotute -  thukhawmin Teachers’ Day hmandan tur an rel a. Kuminah Teachers’ Day pualin Token flag, Car flag, Ball pen leh key chain te siam a ni a, heng hi school tinah sem a ni ang a, zirlai naupangten mipui hnenah an zuar dawn a ni. Mitin ten thahnemngai takin zirtirtute chawimawi nan heng thilte lo leisak turin Committee hian a ngen a. Kumin target hi Rs.6,50,000 niin sum hmuh zawng zawng hi Teachers’ Welfare Fund-ah chhun luh a ni ang.

Kumin Teachers’ Day hi zirna in tinah hman tur a ni a, National leh State Award dawng tawh zirtirtu thawklai leh pension tawh te pawh sawmin chawimawina hlan tur a ni a, an thutna pawh special taka ruahman tura rel a ni.