Art &Culture Minister Pu PC Zoram Sangliana chuan he thu hi vawiina Govt. Hrangbana College Golden Hall a College Week kharna inkhawmah a sawi a. College Week kharna bakah “Zo Ni” (Cultural Day) atana hman nghal niin zirlaite leh zirtirtu ten Mizo thuam an inbel a. Art &Culture Minister hi khuallian niin an College Principal Pu K. Liantuala chu Chairman a ni.

Minister chuan Hrangbana College in Mizo hnam incheina mawi tak inbela Cultural Day hman nachang an hria chu fakawm a tih thu a sawi a. Mizo thalai ten Cheraw hmanga World Record an siam avang khan thalaite thinlungah hnam rohlu ngaihsanna a intuh thar nia a hriat thu sawiin hnam dang ten Mizo hmeichhia an hriat theihna awlsam ber, Mizo hnam incheina mawi tak puanbih chu uar deuh deuh turin College zirlai hmeichhia te a chah a. College Principal te hnenah ‘puanbih ni’ siam tura a lo ngen tawh thu sawiin Cultural Day hmang tura kal HBC zirlaiten puan an bih chu lawmawm a tih thu a tarlang nghal a ni. Minister chuan zirlai te chu an kal chhoh zelnaah rinawmna a pawimawh ber a ni tiin tlatfalna hmuna ‘Aih’ ti ngam Zoram in a mamawh a ni, a ti a. Tumahin an hmuh phak lohna hmuna rinawm tlat ngam tura chahin chung mi rinawmte chuan a takin Mizo khawtlang nunah danglamna  ‘change’ duhawm an thlen ang, a ti. Pu Zoram Sangliana chuan College Week an hman chhunga inelna danglam tak, damlo te tana a thlawna thisen pek inelna an buatsaih chu Hrangbana College zirlai te leh zirtirtu te an fakawmin an entawntlak hle a ni, a ti bawk.

Pu Zoram Sangliana hian College Week an neih chhunga inelna hrang hranga ber kaite hnenah lawmman a sem a. Mizoram University Exam a Subject mala Mark hmu sang ber hnena kum tina an hlan thin cheng 10,000 keng R. Zatlaia Award chu Psychology Topper Anne Lalnunmawii Pachuau hnenah a hlan a. University Exam a First Division a passed mi 5 te hnenah Hrangbana Award a sem bawk.

College an hman chhung hian Indoor leh Outdoor infiamna chi hrang hrang bakah nungcha humhalh, thisen pek leh AIDS lam hawi Essay, Debate leh Slogan Writing hmangin zirlaite an inel a. Kum danga la tih ngai loh Blood Donation, AIDS Marathon leh Photography  hmang te in inelna an nei bawk.

Minister hian Hrangbana College tan hian kawrchei Set 3 (24) leh thangchhuah kawr (puanthan) set 3 a pe a ni.