3524/2023-2024

Dated Serchhip, the 26th January, 2024: India ram hmun dangte rualin Serchhip District ah pawh vawiin khan Republic Day 2024 chu ropui takin lawm a ni a. Serchhip Sports Complex-a Republic Day lawmnaah hian Deputy Commissioner Pu David Lalthantluanga chu khuallian niin parade contingent 18 te hnam puanzar chibai buk a chhang let a ni.

Khuallian chuan kum 2023 atanga 2024 chhunga Serchhip District a sawrkar hmalakna langsar zual thenkhat te he hunah hian a sawi a. MGNREGS job card holder 16,033 te tan December, 2023 thleng khan inhlawhna ni 69 siam sak an ni a, PMAY-G ah Serchhip District chhungah beneficiary chhungkaw 426 chu Sawrkar Laipui RD Ministry chuan a pawm a, heng zinga 266 tan sanction pek chhuah a ni tawh. PM-Kisan chungchang sawiin DC chuan loneituten hamthatna kum khatah Rs.6000 an dawn theih nan theih tawpin hmalak chhunzawm reng nih thu te, Serchhip district atanga dil zawng zawng te uluk taka verify an nih hnuah a dawng thei tur 5747 thlan chhuah an ni a; e-KYC, APBS fel thlap te chu January, 2024 hian 16th installment pek an ni ang, DC chuan a ti. Horticulture hmalakna langsar zingah Dragon Fruit chin beihpuithlak a nih thu sawiin kum 2023 khan dragon fruit phun tur 9000 semchhuah a nih thu leh 600qtls zet thar chhuah a nih thu a sawi a. Greenhouse tomato quintal 450 tharchhuah a ni a, zikhlum pawh quintal 10,000 zet Serchhip District ah tharchuah a nih thu khuallian chuan a sawi a ni.

Health Department report tarlangin Serchhip District-ah January 2023 - December 2023 chhung khan nau piang 435 an awm a, thi 11 awmin Infant Mortality Rate chu 25.3 a ni a, nu nau chunga thi erawh an awmlo, tih khuallian chuan a sawi a. Mi rethei ten hospital-a inenkawlna man tlawm an dawn theih nan ABPMJAY hnuaiah Serchhip District chhungah chhungkaw 42,000 te tan Golden Card siamsak an ni a. Nu ten hospital-ah ngei nau an hrin theih nan JSY leh JSSK scheme kalpui niin sawrkar damdawi in panna leh senso dang zawng zawng sawrkarin a awl a, JSY scheme chhawr tangkaitu mi 464 awm tawhin JSSK beneficiary mi 392 an awm a ni.

Jal Jeevan Mission hnuaiah PHE chuan thingtlang khuaa chhungkaw tin ten mahni inchhunga tui an herh haw theihna Functional Household Tap Connection (FHTC) 7147 pe chhuakin chhungkaw za ah za an tuam chhuak tawh a. Serchhip District chu ODF plus model category-ah puan fel a ni tawh bawk.

Pu David Lalthantluanga chuan dan leh thupek kengkawhtu Police Department te, kawlphetha pechhuaktu Power Department te, inkalpawhna kawng sialtu PWD te, zirna kawnga hmalakna chungchang te leh Serchhip District chhunga Office dang ten mipui rawngbawl hna an thawh dan he hunah hian a tarlang a. Serchhip District inrelbawlna leh sawrkar hmalakna thlawp tlattu kohhran te, tlawmngai pawl te, chanchinbumi te leh mipui mimir te chungah lawmthu a sawi a. An tanpuina leh tawiawmna tel lo chuan sawrkar ruahmannate hi a puitling tak tak theilo, a ti a. Serchhip District in nasa lehzuala hma a sawn a, District dang te tan pawha entawntlaka siam turin thawhhopuiah Serchhip DC Pu David Lalthantluanga chuan Serchhip District mipuite a sawm a ni.

Serchhipa Republic Day lawmna programme-ah hian parade contingent 18 an awm a, armed contingent 1, unarmed contingent 8, school contingent 9 an awm a ni. Unarmed Contingent ti tha ber lawmman dawngtu chu NCC Army Wing, Govt Serchhip College an ni a. Lawmman pahnihna chu Little Flower Convent School Scouts and Guides ten an dawng a, lawmman pathumna dawngtu chu Govt Serchhip College NCC Air Wing an ni. School Contingent zingah pakhatna dawngtu chu Goodwill English Academy an ni a, pahnihna Brilliant Higher Secondary School niin Little Flower Convent School ten lawmman pathumna an dawng a ni.

Vawiin hian hna thawh that vanga chawimawina sang Governor’s Gold Medal chu Excise and Narcotics Sub Inspector B Lalengmawia hnenaah hlan a ni a, Excise and Narcotics Constable Pi Linda Lalhmangaihsangi’n Governor’s Silver Medal a dawng a. DGP Commendation Award chu Serchhip DEF atangin Constable pahnih - H.Vanmalsawma leh C. Lalroluaha te hnenah hlan a ni bawk a ni.