Socio-Economic and Caste Census 2011 (SECC 2011) chu Serchhip District-ah tukin  dar 7:00 AM khan Serchhip DC quarter atangin neih tan a ni a, a bul tan nan District Bawrhsap Pu P.Lalchhuanga chu chhiar hmasak ber an ni.

District Bawhsap chuan SECC Chhiarpui pawimawhzia sawiin, mi harsa zawkte chawikanna tur project leh programme siamna atana thil pawimawh tak a nih dawn avangin fimkhur theihtawp chhuah a ngaih mai bakah mipuite pawhin an tana tha tur tih hria a Enumerator te tha taka lo dawngsawng thin turin leh data dik leh rintlak a awm theih nan Enumerator ten hriat tur tul an zawh te dik taka lo chhang turin Serchhip District mipui zawng zawngte a ngen a ni.

SECC Chhiarpui atana thawktu tur – Charge Officer, Master Trainer, Supervisor leh Enumerator te chu sorkarin ruahmanna a siam zul zuia appointment pek fel an nih tawh bakah Training tul ang pawh pek fel vek an ni tawh a, Serchhip District-ah March ni 10, 2012 atanga tana  April ni 10, 2012 a zo fel tura sorkarin ruahmanna a siam a, amaherawhchu, he Chhiarpui (census) hi paperless census a nih anga hmanraw tul Tablet PC indaihlohna avangin sorkar hun ruatah tan theih a ni ta lo a ni tih sawiin District Bawrhsap chuan Tablet PC leh Data Entry Operator hmahruai an lo thlen veleh hna hi tan nghal a ni a ti a. Chawlhkar khata tan tlai a ni chung pawh hian Tablet PC leh DEO mamawh ang a awm kim chuan 10th April, 2012 hmaa zawhfel hman ngei an inbeisei leh an tum thu a sawi bawk.