Mizoram sorkar, Information & Public Relations department bultuma Sikkim tlawhtu Mizoram chanchinbumi pasarih te leh anmahni hruaitu Information Officer te chuan vawiin khan India leh China inrina, Nathula Pass an tlawh.

Nathula leh a bul vel hi feet 14000 vela sang a ni a, helai hmun tlang sang pui puiah hian vur a awm reng a, heng hmunah te hian chanchinbumite hian thla te lain, khawvela tlang sang ber ber te an thlir kual a ni.

India ram hmun hrang hrang atangin khualzinmi (tourist) tam tak chuan he tlang hi an tlawh a, foreign tourist chu tam lutuklo mahse, tourism hi a ram mite eizawnna ber a ni. Sikkim-ah hian season khat (thla thum vel) chhungin a ram mi aia tam khualzin an awm thin niin an sawi.

Nathula kawng hi tlangram chhengchhe tak tak, kham kar kawng sang pui pui a ni a. Nitin lirthei tam tak an kal thin a, amaherawhchu, lirtheia chesual an awm ngai meuh lo niin an sawi bawk.

Sikkim rama tlangsang tak tak te hi ramri (border) a nih avangin India sorkar pawhin a sipai tha ber ber te chu khaw vawt tak hnuaiah changtlung takin a dah a. Heng mite hian ram venhim hna bakah khualzin mite pawh an veng thain, khualzin mite tan an thlamuanpuiawm hle a ni.

Tarlan tawh angin Mizoram sorkar tirha Sikkim tlawhtu chanchinbumite hi - H.Laldinmawia (The Zozam Times), H.Vanlalnghaka (DDK, Kolasib), H.Lalngaihawma (Hnehtu), Lalremruata Ralte (Tawrhbawm), Ricky Vanlalnghaka (Mizo Aw), Lucas Thangmangliana (Dumde, Champhai) leh Lalnunkima Pisa (HS Vision, Saiha) te an ni a.

Heng mite hi Information & Public Relations Officer, Vabeiratlua chuan a hruai a. Sikkim an cham chhung hian TT Lepcha, Editor, Sikkim Herald chuan a hruai kual bawk a ni.