Vawiin khan Handloom Export Promotion Council (HEPC), New Delhi leh Weavers’ Service Centre (WSC), Agartala-te bul tumin “Awareness Seminar/Workshop on Export of Handloom Products” I&PR Auditorium-ah neih a ni a. Industries Department leh ZOHANDCO aiawhte bakah HEPC atang hian Pu R.P. Rajalingam, Export Promotion Officer lo telin, WSC atang hian B.B. Dutta, Deputy Director leh a thawhpui pahnih (2) an lo tel.

Seminar/Workshop hawngtu ZOHANDCO Chairman Pu Albert Lalthlamuana chuan handloom a kan thil dehchhuahte hi India ram pawna thawn chhuah tlak a niin, quality tha rualpat a siamchhuah a tul thu a sawi a. Kan hnam mawlpui, thenawmte siam aia tha a kan siam chhuah a tulzia uar takin a sawi. Ram pawn a thil thawn chhuak tur chuan rinawmna leh taimakna a tulin, vawi hnih khat hlawhchham avanga beidawng mai lo turin mipuite a fuih.

Seminar hawnna a tel ve Addl. Director Pu C. Lalbiakthanga, Addl. Director, Industries chuan Handloom hi Mizoram a Industry malkhaiah chuan dehchhuah ngah leh thawktu tamna ber a ni a, tun aia sorkarin a thanlen zelna tur a ngaihtuah uluk tul a tih thu a sawi bakah sorkar laipui atanga tanpuina dawng tlak ni tura puantahtuten nasa taka tan la a, sum hmanral leh leichhuah ziahna fel taka vawn a tul zia uar takin a sawi bawk.

HEPC Export Promotion Officer Pu R.P. Rajalingam chuan Power Point Presentation hmangin kalkhawmte chu sorkar laipui policy leh scheme hrang hrang a hrilhfiah bakah puantahna neitute chu HEPC hmang tangkai a, ram pawn a an thil dehchhuah thawn chhuak turin thahnemngai takin a hrilh bawk. Exporter ni tura thil tul chi hrang hrang tarlangin, kum 1 lokal leh tur chhunga Mizoram puantah neitute mi 10 talin HEPC ah inziak lut ve turin a ngen a. Kum 2012-2013 chhunga HEPC huaihawta khawvel hmun hrang hranga Exhibition/Fair neihna tur hmun 17 te tarlang in, Mizoram atang pawha heng ah hian lamkal intirh a beisei thu a sawi bawk. HEPC dinhmun hrechiang zawk duhte chuan www.hepcindia.com tlawh thin turin a chah bawk.