Vawiin chawhma dar 11 khan Serchhip DC Office Chamber ah District Bawrhsap Pu P.Lalchhuanga hovin District chhunga NLUP Line Department hrang hrang hotute NLUP kaltlanga an hmalakna leh hmalak zel dan tur ngaihtuahin an thukhawm.

Bawrhsap chuan Line department hotute chu an thahnemngaihna leh thawhhona that vanga tluang taka NLUP kalpui ani chu lawmawm atih thu a hrilh a, nasa leh zuala tan la a midangte entawntlaka thawk tura theihtawp chhuah zel turin a fuih bawk a ni.

Vawiin thutkhawmah hian District a thawktu indaihlohna nasat avanga NLUP tanpuina dawngtute hnathawh a hmuna endik (spot verification), chungchanga harsatna an tawh sut kian na tur atana NLUP Apex Board in Line Department te inpuitawn a, “Cross Sector Verification” neih dan tur ruahman tura a hriattir chu an sawi hova, Line Department zing ami tupawhin spot verification emaw field visit emaw nei tura an chhuah dawn in a hma ni 3 vel ah tal Deputy Commissioner hnenah ziakin an verification schedule pek thin ni se an ti a, DC in Line Department dangte hnenah spot verification neihna tur area an Department hnuaia beneficiary en dik sak ve tura an duh a zawt ang a, heta Line Department dangte beneficiary list thehluh te chu spot verification nei tur Line Department ten an lo en kep thin tawh dawn a ni. Hei hian beneficiary te hnathawh dan endik kawngah leh tanpuina sum pekchhuah kawngah nasa leh zuala hnathawh a tihchak beisei a ni bawk.

Vawiin thutkhawmah hian Line department thenkhat te chuan an hnuaia beneficiary te, an trade thlan a harsatna tawk leh tifuhlo zual te dinhmun an tarlang a, heng hnathawk tha tak tak tur, kal ngaihna hre silo ho ten an tuina leh an hlawhtlinpui theih ngei tur trade an hmuh theih nan ruahmanna thar siam tha an ti a, beneficiary hnathawk tha duhlo leh zilh fin theih loh te chunga hmalak dan tur te pawh an sawiho bawk a ni.

Hei bakah hian an hmalakna chungchanga harsatna chi hrang hrang an tawh te sawihovin a sutkian dan tur te an ngaihtuah tlang a, chak zawka hma lak anih theih nan leh thawhhona tha zawk a awm theih nan, Village Council inthlan zawh hun remchang hmasa ber ah District-Level Monitoring Committee leh District-Level Implementing Committee te a huhova thutkhawm (Joint meeting) nise an ti bawk.