Tahrik 17.2.2012 (Zirtawpni) khan Ministry of Home Affairs , Govt. of India Joint Secretary i/c North East Pu Sambhu Singh hovin Mizoram sorkar aiawh Home Secretary Pu K. Riachho, IAS leh Tripura sorkar aiawh Principal Secretary i/c Revenue & Rehabilitation Pu G.K. Rao te Tripura New Secretariat Conference Hall-ah Tripura Sakhan tlangdunga Mizote Tuikuk hlau a raltlante chhawmdawl dan chungchang ngaihtuahin inbiakna neih a ni.

He meeting hian Mizo raltlan chhungkua 83 te hnenah chhawmdawlna pek a rem ti a. Tripura Jampui tlangdung a chhungkua 32 la awm te chu Tripura sorkar kaltlangin chhawmdawlna hi pek an ni ang a, a dang chhungkaw 51 Mizoram a raltlan te chu Mizoram sorkar kaltlangin pek an ni ang.

Home Secretary Pu K. Riachho, IAS hi Pu Rodney L. Ralte, IAS, Mamit DC, Pu C. Laldina, MPS, Joint Secretary Home Department, Pu David H. Lalthangliana, MPS, OSD, Home Department leh Pu Lalthangmawia Vandir, MIS, Deputy Director, I&PR ten an tawiawm a ni.

A tuk tahrik 18.2.2012 (Inrinni) khan Minister of Home Affairs Pu P. Chidambaram pawhin Tripura District a Tuikuk refugee camp, Naisingpara a tlawh a. Hetah hian Tuikuk pawl hrang hrang leh Sakhan Mizo raltlan ten Memorandum te Home Minister hnenah hian an thehlut a ni. Hetah hian inkawm khawmna te neiin Home Minister chuan an harsatna an sawi leh ziaka an thlen te chu sawiho puina a nei. Home Minister hian an thuthlen chhanna chu Mizorama an kir hun hun ah Central leh Mizoram sorkar ten an sutkian sak tur thu a hrilh. He mi chungchangah hian Tripura leh Mizoram te pawh a tlawh leh tur thu a sawi bawk.