639/2026-2027  

Dated Serchhip, the 21^st May 2026 : Nimin khan Serchhip District Bawrhsap Pu Paul L. Khuma kaihhruaiiin, Consultant Firm IPE Global Limited leh Serchhip District-a Department hrang hrang hotute’n Thenzawl Peace City dinna tura thil pawimawh chi hrang hrangte, DC Meeting hall Serchhip-ah an sawi ho.

He consultation meeting-ah hian Thenzawl Peace City atana Detailed Project Report (DPR) siamtu IPE Global Limited chuan ruahmanna an siam dan  hrang hrangte Power Point Presentation (PPT) hmangin an entir a. Department hrang hrang hnen atanga an mamawh hrang hrangte thlenin, Peace City   area huam chhunga sawrkar department ten   ram an neih zat leh hmalakna hrang hrang lo awm tawh leh awm mek te pawh ruahmanna siam nan an hnena hriattir turin an ngen a, Department hrang hrang aiawhte pawhin an department project neih sa leh ram hmunhmate tarlangin hma lak zel dan turte sawi ho a ni a; heng hmalakna hrang hrangte hi plan (ruahmanna) siam nan DPR siam mekah an lo dah tel vek tur thu IPE Global Limited chuan an sawi a ni.

IPE Global Limited hi ram 100 chuang zeta hna thawk tawh leh India ram chhung hmun hrang hranga City Master Plan hlawhtling taka lo ruahman tawh thin, khawvel pum huapa consultancy firm lian leh rintlak a ni a; Mizoram sorkar chuan Thenzawl Peace City Master plan leh Detailed Project Report (DPR) siamtu atan a ruai a ni.