Nimin khan Serchhip District bawrhsap Pi Juhi Mukherjee, IAS chuan Asian Development Bank kaltlanga siam tur Serchhip leh Buarpui inkar kawng (kilometer 55) a compensation pek dan tur ruahmanna ‘Draft Award’ zir chiangin Thenzawl a tlawh.

Bawrhsap hian Draft Award a tel mi chi hrang hrang kawm kualin ram neitu dik tak an nih leh nih loh te, compensation an dawn turah an lungawi leh lungawi loh te, Draft Award buatsaihtu ten dik taka an thawh leh thawh loh te chik takin a zawt a, hma lak tawhna ah lungawi thlak a tih thu leh felfai taka ruahmanna siam ani chu lawmawm a tih thu a sawi a ni.

Serchhip-Buarpui ADB Road Draft Award hi peih fel thawkhat a ni tawh a, Bawrhsap hian Revenue Department pawmpui tura thawn anih hma in felfai taka thil tih anih theih nan amah ngeiin a hmunah kal chilhin a endik a ni.

Bawrhsap hi Project Director, Project Implementing Unit, Mizoram PWD Office atangin Executive Engineer leh SDO in an tawiawm a, Revenue Department atangin Serchhip ASO leh Surveyor ten an tawiawm bawk a, Thenzawlah hian Thenzawl SDO(C) leh Village Council member ten ruahmanna siamin an lo dawng sawng a ni.