4096/2025-2026

Dated Serchhip, the 22nd January, 2026: Vawiin khan Serchhip District Level Committee on Vibrant Village Programme-Il chu an Chairman Pu Paul L Khuma hoin Serchhip DC Meeting Hall ah an thukhawm.

Virbrant Village Programme (VVP)-II kalpuina atan hian Mizorama RD Block 16 atangin, thingtlang khaw 109-te chu Ministry of Home Affairs-in a thlang a. Serchhip District ah chuan Serchhip RD Block hnuaiah Keitum khua; East Lungdar RD Block hnuaiah Mualcheng, Lungkawlh, Bawktlang, North Vanlaiphai, Leng leh Sailulak te a huam a ni.

Ramri khuate hmasawnna tur sawrkar laipui hmalakna Vibrant Village Programme (VVP)-I hi kum 2023 khan India-China ramri ah bul tan a ni a. India-Myanmar leh India-Bangladesh ramri khuate huam turin Vibrant Village Programme II hi kum 2024 atang khan kalpui tan leh niin Serchhip District chhunga khaw sarih (7)-te pawh a huam tel ta a. Central Sector Scheme a nih angin funding hi sawrkar laipuiin 100% a tum dawn a ni. Sawrkar laipui scheme kalpui mek sa te nen a theih chin chinah (converge) tur a ni a. Convergence a rem lo a nih chuan, MHA level ah endik leh tur a ni.

VVP-II hian tum bulpui pali a nei a, chungte chu - a fur a thala lirthei tlan theihna (all-weather road connectivity) te, inbiakpawhna tha (telecommunication) te, Television leh Electric connection (on-grid connectivity) te a ni a. Ruhrel awmsa tihchangtlun bakah an mamawh pek belh an nih theih nan Village Action Plan (VAP) huam zau thei ang bera duan tur a ni a, heng a tum bulpui palite hi ngaih pawimawh tur a ni. VAP hi thla 3 chhunga siam zawh tur a ni a. Scheme awmsa suihfin (convergence) ngaih pawimawh tur niin heng khuaa cheng ten a huhoa hmasawnna an neih theihna tur ruhrel din a ni ang. VVP -II atan hian Bawrhsap kaihhruaina hnuaiah District Level Committee on Vibrant Village Programme-Il din a ni a. District Level Committee hi Chief Secretary kaihhruainaa din State Level Screening Committee for Vibrant Village Programme-Il in a khai leh a ni.

DC Pu Paul L Khuma chuan ruhrel (asset) rotling din tura tan lak ni se; VVP-II hi kum 2028-2029 thlenga kalpui tur a nih avangin hnathawhna hun hi kum 3 vel chauh kan nei tawh a, tan lak a ngai nasa hle a ni, a ti. Line Department ten VVP-II in a huam khuaah te hian eng scheme nge an kalpui mek, tih leh kalpui hmabak te hre reng chungin VAP duang turin a chah a. A khaw mipuiten an hman tangkai theih tur leh funding a tawp hunah pawh intungnung chhunzawm thei tur kan siam a ngai a ni, a ti bawk.

Vawiin meeting ah hian District Level Committee member te leh VVP-II huam khaw sarih (7) VC te an tel a ni.