1842/2026-2027

Dated Serchhip, the 18^th August 2026: NHIDCL ten Serchhip District chhunga kawng an siam mek chungchangah vawiin khan Serchhip DC Pu Paul L. Khuma hovin Press Conference neih a ni a. Mizorama NHIDCL hotupa ber Executive Director Pu Adelbert Susngi leh Contractor-te pawh an tel a ni.

District Bawrhsap Pu Paul L. Khuma chuan Serchhip District in kawngpui tha leh tlo an neih theihna tura theihtawp an chhuah zel tur thu leh a tul dan a zira Legal Action la thei turin Legal Team din a nih thu te, KRAM Infracon Pvt. Ltd. chungah chauh lo pawh anmahni ruaitu NHIDCL lakah pawh Legal Action hi a tul chuan lak a nih tur thu a sawi a. NH02 contractor-te kawng siam dan leh an enkawl zui zel dante uluk taka vil reng a nih thu sawiin, Serchhipa chanchinbu mite, Sub Headquarter YMA leh Joint VC aiawhten an tawiawmnaah lawmthu a sawi a. MJA te hmalakna avanga Ministry beng hial a thleng thei leh NHIDCL thuneitu lian Pu Adelbert Susngia’n a rawn telpui thei chu lawmawm a tih thu a sawi. Kawng siam tha tawk lo avanga harsatna tawh a nih dante sawiin, 2025 April thla atanga nimin 17 August, 2026 thlenga kawng chungchanga Monitoring/Inspection/Meeting an lo neih tawh hrang hrangte a tarlang a. Package 1 & 3 chu a that thawkhat thu sawiin Package 2, KRAM Infracon te hnathawh erawh a chhiat thu a sawi a; kawng siam uluk loh hi mipuite chunga pawisawina Public Nuisance a nih thu sawiin, Defect Liability Period tlem la awmah, theihtawpa vila, quality tha thei ang bera hma la turin a hrilh nawn leh a; District mipuite pawh thahnemngai taka kawng siam leh thawm that hnate vil pui turin a sawm bawk.

NHIDCL hotupa, Executive Director Pu Adelbert Susngi pawhin Ministry beng hial a thlen tawh avangin Contractor KRAM Infracon te chu tha taka hna thawk turin a hrilh a, Contractor ten an intiam angin August ni 20, 2026 chhungin kawng khuar chhelai an hnawh zawh atanga ni 7 chhungin By-Pass Road chhelaite pawh a tul anga PCC/Cement-a chhung tura tih an nih thu a sawi bawk.

NH54 tia hriat thin National Highway 02 tia thlak tak hi Serchhip District chhungah Pakage pathuma then niin By-Pass Road pahnih a awm a, NHIDCL hnuaia contractor pathum - Shivalaya Construction Ltd. (Pakage 1: Phulmawi – Baktawng Mawlkawi), KRAM Infracon Pvt. Ltd. (Pakage 2: Baktawng Mualkawi – Keitum bakah Chhiahtlang leh Serchhip By-Pass road) Bhartia Infra Projects Ltd (BIPL) (Pakage 3: Keitum - Bungtlang) ten thawkin, Pakage 1 & 2 te hi kum 2024 ah khan siam zawh niin Package 3 hi kum 2025 khan siam zawh a ni a. Kawng an enkawlzui hun tur chhung (Defect Liability Period) hi, hna an thawh zawh atanga kum 4 chhung a ni.

Tuna kawng thawm that hna hi fur chhung atan temporary-a thawh niin, fur ruahtui tlak zawhah kawng hnawhnate hi phawrh leh veka, lung quality tha ber ber nena a thara hnawh a, Metal that leh tur a ni.

Vawiin Press Conference-ah hian Addl. DC Pi Dorothy Muansangi, SDO(S) Pi Rebecca Laldinmawii Hrahsel, NH Branch Officer, SDC Pu Chawngthu Lalrinhlua te bakah kawng siamtu contractor te telin, Joint Inspection Team te report atangin zawhna leh chhanna hunte hman a ni bawk.