1843/2026-2027

Kolasib, 18th August, 2026: Vawiin chawhnu dar 3:00 khan  Deputy Commissioner Office Chamber , Kolasib-ah Kolasib Bawrhsap Pu H. Dolianbuaia kaihhruaiin Mizoram District Transformation Programme (MDTP) Project hnuaia hna thawh mekte thlirhovin thutkhawm pawimawh tak neih a ni.

Thutkhawm kaihruaitu Bawrhsap Pu H. Dolianbuaia chuan MDTP hnuaia hmalakna hrang hrang thawh mekah, a thawktute inpekna leh hnathawh tha tak chu fakawm a tih thu a sawi a. A bikin District Information & Public Relations Department (DIPRO) ten Diakkawn, Kolasib-a Public Information LED Display Board siam hna an chanpual chu  100% thawk zovin, July ni 3, 2026 khan hlawhtling taka an lo peihfel tawh avangin an chungah lawmthu a sawi a . Hemi rual hian department thenkhat hna la zo lo leh hma la la tlemte pawh chu  tan la thara, September thla chhung ngeia hna thawk tan a, peihfel hman tum turin a chah hlawm bawk.

He thutkhawmah hian MDTP hnuaia Implementing Agency leh Department hrang hrang ten an hna thawh dan leh an dinhmun theuh an  thlen a. Heng hnathawhte hi a hmunah ngei uluk taka enfiah (inspection) a nih theih nan September thla laihawlah inspection neih nise tiin an rel a ni. Hna awm hrim hrim hi October thla chhunga zawh vek tura rel a ni bawk.

Report-a tarlan anih danin, MDTP FY 2025-26 hnuaia District Catalytical Intervention Plan hmalakna atan hian cheng nuai 90 (Rs. 90,00,000) ruahman a ni a. He sum atanga hmalakna hrang hrangte chu:

DUDO, UD&PA hnuaiah Diakkawn leh Khuangpuilam-a Footpath, Railing leh Tiles siam leh thuamthat hna atan Rs. 39,00,000 ruahman a ni.

DC, Kolasib hnuaiah DC Conference Hall chhung leh Garage thuamthat hna atan Rs. 25,00,000 ruahman a ni.

DUDO, UD&PA  hnuaiah Convent Road, Venglai-a Footpath, Railing leh Tiles siam hna atan Rs. 2,96,800 ruahman a ni.

District Sericulture Office hnuaiah Saidan-a Govt. Muga Seed Farm-a Muga Grainage Building thuamthat hna atan Rs. 2,66,500 ruahman a ni.

DRO, Kolasib hnuaiah 'My District, My Vision' intihsiakna leh inzirtirna buatsaih nan Rs. 4,20,000 ruahman a ni.

DIPRO hnuaiah Diakkawn-a Public Information LED Display Board siam nan Rs. 8,57,700 ruahman niin hlawhtling taka zawh tawh a ni.

Govt. Kolasib College hnuaiah mitdel zirlaite tana hmalakna (Enabling Visually Impaired Students) atan Rs. 7,59,000 ruahman a ni bawk.

He thutkhawmah hian District Planning Committee member te - Pi B Malsawmtluangi, Addl DC Kolasib te, Pu H Lalramliana DUDO te, Principal (Govt. Kolasib College) te, District Sericulture Officer, DIPRO leh SDC i/c Planning te an tel a ni.