2155/2025-2026

Dated Serchhip, the 11th November, 2025: Vawiin khan Serchhip DC Pu Paul L Khuma hovin Serchhip District chhunga Non Notified Forest Area (NNTFA) chungchang Serchhip DC Meeting Hall ah District Level Committee ten an rel.

Serchhip District chhunga NNTFA Supreme Court of India hnena 1997a Affidavit file tawh te chu Lungrang Tlang (Thenzawl East VC), Lungreng Tlang (Lungkawlh VC) leh Lungpho Ngaw (Lungpho VC) te an ni a. NNTF Area atanga paih hi State Level Expert Committee in rem a tih loh avangin a ramri leh a zau zawngte mumal zawka teh tha lehin State Expert Committee ah thehluh ni se, tiin an rel a ni.

Tun dinhmuna Serchhip District chhunga NNTF area thar tura rawtna lut zingah Lalvunga Hmun liam, Bawktlang leh Khurthar Chung, East Lungdar te chu pawm a ni a. Rawtna lut zingah North Vanlaiphai ram erawh ruahmanna dang a lo awm tawh avangin telloh mai ni se, Expert Committee ah ziak thlen ni se tiin an rel. Ziakna puk, Leng VC huamchhunga awm pawh RO te leh khawtlang hruaituten lo a ram chungchang sawiho leh se, an ti bawk.

Serchhip District chhung sawrkar reserve pawna sawrkarin thing phunna a lo neih te chu record felfai taka siam tur a ni a. Heng sawrkar plantation te hi Forest Area zingah rin luh vek tur an ni. District Level Committee chuan heng record te hi November ni 29 ral hmain State Level Expert Committee ah hriattir tura tih an ni a. Record siam a nih theih nan stakeholders - VC leh mi pawimawh dang te nena sawiho hmasak ni se, tiin an rel a ni.

Vawiin meeting-ah hian EF&CC Department, Revenue, DLAO, Sub Headquarters YMA, Neihloh Branch YMA, Joint VC Serchhip District bakah Thenzawl East, Lungpho, Lungkawlh, North Vanlaiphai, Leng, East Lungdar leh Bawktlang VC te an tel a ni.