Serchhip District chhunga Oil Palm chin te chu a rah seng tan a ni ta a, nimin (29th May, 2013) khan Thenzawl khua ah a vawikhatna atan Oil Palm rah te hi 3F Oil Palm Agrotech Pvt. Ltd. chuan an lei a ni.

Serchhip District chhungah hian kum 2008 atang khan Oil Palm hi chin tan niin hemi kum hian Hectare 133.48 a zau ah Oil Palm tiak 20,023 phun a ni a, tun thleng hian ram Hectare 1229.77 a zau ah Oil Palm tiak 1,83,482 phun ni tawhin tun dinhmunah Oil Palm tiak phun nun hi 1,58,987 a ni tawh a,Oil Palm hi khaw 10-ah chhungkaw 839 ten an ching mek a, kumin ah hian ram Hectare 330-a zauah Oil Palm tiak 74,000 phun tum a ni a, amaherawh chu Oil Palm Nursery-a Oil Palm tiak te hi duhthusam a tha ala nih loh avangin tunah hian ram Hectare 140.96 a zauah chin turin 20,158 semchhuah tum a ni. Oil Palm tiak semchhuah hmasak tur a tlem avang hian a phunna tura khur lai tawhte hnenah sem hmasak tum niin a bak chhungkaw dangte hnenah hian kumin July thla leh August thla velah semchhuah leh hman beisei a ni a, tuna a rah tharchhuah te hi 3F Oil Palm Agrotech Pvt. Ltd. chuan Kg. khat zelah Rs. 4.75/- in an leisak nghal a ni.

Nimin a Oil Palm rah lei tanna ah hian Pu Daniel-a Oil Palm hmun ami chu a rah sengin buk nghal a ni a, hemi hnu hian Thenzawl-a AMFU Market Building-ah hemi pual hian inkhawm neih zui nghal a ni a, he hun hi Pu C. Thansanga, Manager, 3F Oil Palm Agrotech Pvt. Ltd. chuan kaihruaiin he hun hmanpuitu Dr. C. Lalzarliana, Director Agriculture (CH) chuan Mizoram-a loneitute tana sumchang thlai hlawk tur leh a hralhna buailo tur thlai chin tur Sawrkarin a ngaihtuah thin thu leh Oil Palm chu Mizoram tana tha tur leh Oil siamchhuahna atana hman thlai zingah a hlawk ber ni a an hriat thu a sawi a, Oil Palm thar chhuah tam chu Sawrkar Laipui pawhin Policy-ah neiin hetianga thlai mal Policy-a neih hi tunhma in a la awm ngailoh thu sawiin, hetianga Market nei tha thlai hi Mizoram-ah pawh a la awm loh thu leh a awm leh tawh pawh a rinloh thu a sawi a, Serchhip District-a Oil Palm tharchhuah sawngbawlna tur khawl chu nakum ah chuan peihfel hman beisei a nih thu a sawi bawk. He hunah hian Hyderabad atang lo kal Pu SR. Chintamani, General Manager, 3F Oil Palm Agrotech Pvt. Ltd. pawhin thu a sawi a, Pu James Lalsiamliana, DAO Serchhip chuan Oil Palm chin chungchanga an hmalakna hrang hrang a tarlang bawk a ni.

Attachment

  • Loading attachment...