Kumin kum tawp lama Mizoram Assembly inthlanpui hmachhawn tur thlirin Election Commission of India chuan Mizoramah Electoral Roll Special Summary Revision nei turin thu a titlu a. Hemi chungchang hrilhfiah hian vawiin khan I&PR Conference Hall-ah Jt. CEO Pu H Lalengmawia chuan tualchhung chanchinthar lakhawmtu te a kawm a ni.

ECI rawt angin Special Summary Revision hi July 1 atanga tan tur a ni a, final roll chu August 16 ah tarchhuah hman tur a ni. Tun dinhmunah Mizoram ah vote nei thei 683801 an awm a, mihring za zelah 60.11 roll-ah an awm a, heta tanga a lan dan chuan roll a awm lo hi za zelah 39.09 lai niin a lang a, hei vang hian roll-a thun tur mi tam tak la awm angin a lang a ni.

Pu Lalengmawia chuan sawiselna leh puhmawhna hrang hrang awm thin mahse vote thlakna khawl EVM chu Election Commission of India duhdan anga hman tum a nih thu a sawi a. Mizoramin EVM 1500 a neih zingah 187 zet chu siamthat ngai a nih avangin ECIL Hqrs. Hyderabad-ah thawn tura buaipui mek a ni. ECI phalna in Tripura atangin EVM 200 hawh tum a ni bawk. Mipui thlan sorkarna siamah hian vote nei ten an vote hlu tak an thlak ngei chu khua leh tui tha nihna a nih avangin mipui zirtir kawngah tualchhung chanchinthar lakhawmtu te tawiawmna JT. CEO hian a sawm a ni.Vote nei tawh phawt te thlalak Electoral Roll-a lan tir vek chu thilpawimawh tak a nih avangin District tin te pawh tan la sauh sauh tura hriattir an nih thu sawiin Pu Lalengmawia chuan vote nei thar tur reng rengin an passport thlalak copy 2 tal thehluh a tul thu a sawi.

Election leh a kaihhnawih thil a mipuiten an lungawilohna leh hriat fiah duh an neihte awlsam taka an zawhfiah zung zung theih nan Public Grievances Redressal Mechanism hi Election Commission-in a rawn duang chuak a, mi tupawhin an lungawilohna leh hruitfiah duh an neih te phone hmanga an zawh zung zung theihna turin district tinah toll free telephone connection neih vek a ni a. Directorate-ah englai pawhin telephone no.1950 ah election kaihhnawih thil a hriat duh nei tan bik biak theih reng a ni. District hrang hrang a phone no te chu a hnuaia mi ang hi a ni:

Mamit - 0389-2565038

Aizawl - 0389-2320891

Champhai - 03831-235544

Lunglei - 0372-2322025

Lawngtlai - 03835-232195

Saiha - 03835-222114

Serchhip - 03838-226612

Kolasib - 03837-220327.