Naupangte chunga hleilenna thleng thin dolet tu leh an chanvo humhalh sak a, naupang thil tisual (child offender) leh rahbi tleu tawhte chhanchhuaktu pawl Serchhip District Child Protection Unit a thawktute chuan vawiin nileng khan I&PR Conference Hall, IOC Veng, Serchhip-ah intuaitharna hun “Capacity Building Programme on Soft Skills” an hmang.

Vawiin Capacity Building Programme hi Pi Lalsiampuii Tochhawng, DCPO in a kaihruai a, Resource Person Pi Lucy Maruati, Director, Gan Sabra hnen atang thil pawimawh chi hrang hrang – Effective Communication Skills, Team Work, Conflict Resolution leh Meeting Management ah an hnathawhna atana tangkai tur zirtirna ngaihthlak a ni a, naktuk ah Children’s Home hrang hranga thawktute pualin hetiang hun hi hman leh a ni ang.

Serchhip District Child Protection Unit hi Sawrkar Laipuia Ministry of Women & Child Development hnuaia “Integrated Child Protection Scheme(ICPS)” kaltlanga din niin Mizoramah chuan Social Welfare department in he Scheme hi kalpuiin State Child Protection Society hnuaiah an awm a, tunah hian District Child Protection Officer-in hovin thawktu 13 an awm a, Serchhip Vengchungah Office neiin a mamawh apiang tan phone number 03838-226060 ah biak pawh theih an ni.