New Delhi-a cham mek Chief Minister Pu Lal Thanhawla chuan vawiin khan Union Minister for DoNER Gen.V.K.Singh a hmu a, hmasawnna hna thawhna kawnga Mizoramin harsatna a tawh thinte leh Mizoram mamawh leh hmarchhak ina kan mamawh tlan tul bik nia a hriat te a thlen.

Chief Minister chuan NLCPR projects thehluh thin te hi line Ministries in technical clearance an tih khawtlai thin thu ah DoNER Ministry hian chingfel nghal mai thin tawh se a ti a. Skill development chak zawka kalpui anih theihna turin NEC in National Development Volunteer Training a duan tawh chu rem tih pui a hman thuai nise a ti a. Thiamna leh hmangchang chherchhuahna lam pawh uar chhoh nise tiin a thlen bawk a. State officialte leh NEC hnathawkte zing zawka inpawhtawnna siam anih theihna turin Secretary, NEC in hma la se a ti bawk a. Kuthnathawktute tihchakna turin NEC hian chak lehzuala hmalak tul a tih thu tarlangin, hmarchhak mi ten thiamna sang zawk an neihna turin North Eastern Regional Education Council rawtna te tihpuitlin nise a ti a ni.

Chief Minister chuan hmarchhak state te chu khuanurel chhiatna tam tak thleng thin anih avangin, a invenna lam leh chetlakna lamah NEC hian programme mumal tak duang se tiin rawtna a thlen bawk a.Hmarchhak bialin sum lama innghahna tlak a neih a pawimawh thu tarlangin, Chief Minister chuan RRB branch 645 awm mekte chu tihchak a tul thu a thlen a, micro finance lam pawh agriculture leh horticulture behchhana industries tenau bun duhte tan awlsamna siam nise a ti a.Hmarchhak bik tan SIDBI leh NEDFI ten micro credit fund te siam nise a ti bawk a ni.

Sorkar laipuiin Asia chhimchhak ramte nena insumtawnna tichak tura ‘Look East Policy’ a duan chu hmarchhak mi ten kan chhim ve theihna turin border trade siam chu tih makmawh a nih thu Chief Minister chuan a tarlang bawk a.Border Trade chak tak awm thei tur chuan helai hmun ngeia bungrua thawnchhuah tur siamna hmunpui din leh thawnchhuah tlak siam chhuah a ni a ti.

Chief Minister chuan Gen. V.K.Singh chu Chief of Army Staff anih huna Aizawl a rawn zin tur thu Eastern Command GOC-in-C anih lai a sawi, mahse a rawn tlawh leh tak siloh chu sawichhuakin, DoNER Minister anih anga lo zin ngei turin a sawm leh a, lo zin ngei a tum tur thu Chief Minister hi a hrilh a ni.

Chief Minister Pu Lal Thanhawla hi Pu Zodintluanga, Minister for PHE etc in a tawiawm a ni.