Directorate of School Education chuan nimin 9.6.2014 -a DEO, SDEO leh E.O te tana ‘Finalisation of Educational Statistics 2013-14’ meeting School Education Directorate-a a buatsaih chu Pu H.Rohluna, Minister, Pu Joseph Lalhimpuia, Parliamentary Secretary leh Pu R.Lalvena, Secretary, School Education Department ten an hmanpui.

Pu H.Rohluna, Minister chuan ‘Statistics leh record dik tawk kan neih loh thin avangin zirtirtu indaih lohna pawh hriatchian leh chinfel a harsa thin. Department inenkawlna atana tul tur chi zawng zawngah record dik leh tha tawk kan mamawh’ tiin statistics leh record vawnah tan la turin a chah a. Officer-te chu an hmun theuha awm tam tur leh a tam thei ang school tlawha endik tura chahin school leh zirtirtu thawk tha lote chu vil ngun lehzual turin a hriattir a. A tul a nih chuan dan hmanga action lak hreh lo turin a fuih. Field Officer-te lirthei pek an nih loh vanga School Inspection-a harsatna an tawh thin chungchangah lirthei pek tul thu hi Mizoram Sorkar-ah thlen tawh a ni a ti.

‘Thawktu indaih lo hi sorkar-in chhuanlam tlingah a ngai lo va, system fel tawk lo hi kan buai phahna zawk a ni. Sub-ordinate office-a staff indaih lohna phuhruk turin ruahmanna thui tak siam tawh a ni’ a ti. Private School chungchang sawiin fee an lak dan tur pawh duan tawh a ni a, an kalphung pawh hi enthlithlai zel a ni ang. Permission pek thu-ah fimkhur leh uluk a ngai a, danin a phut anga pek tlak ngei an ni em tih a hmun ngeia finfiah a tul a ni’ a ti.

School leh zirlaite enkawl kawngah tan lak lehzual tula a hriat thu sawiin Department Officer te chungah sorkar-in a beisei san thu leh a phut pawh a san thu a sawi a. ‘Minister leh Parliamentary Secretary te pawh hian theihtawp chhuah kan inhuam a, holiday leh zanah pawh office kal kan inpeih reng a. Department thatna atana kan thahnemngaihna hi min hriatpui ula, chutiang atan chuan thurawn pawh kan dawng thei reng’ a ti.

Pu Joseph Lalhimpuia, Parliamentary Secretary pawhin thu sawiin ‘Minister hmalakna avangin thla 6 emaw lek chhungin Department in hmasawnna tam tak kan hmu tawh. Infrastructure tihchangtlunna turin ruahmanna thui tak siam a ni a. Treasury Square-a Department ramah hian Education Complex lian tak din turin hma lak tan mek a ni’ a ti. Office-a thawktute indaihlohna leh hahna hi sorkar-in a hria a. Hah hle mah ila; a ngai pet peta kal lo va hmasawn tura ngaihtuahna thar kan hman a ngai a. Mizoram zima siam tha turin mi hrang hrangin ngaihtuahna seng bawk mah sela, a chhunga thawk officer-te ngaihtuahna aia tha zawk a awm lo vang’ a ti. ‘Kan hnena lo lut file hi tul bik thil a nih loh chuan kawl rei kan tum lo. Officer-te pawhin file tihkhawtlai hi chin loh a tha. Statistics dik leh tha nei tura tan lak deuh deuh zel a ngai’ tiin Minister leh Parliamentary Secretary le biakrawn hreh lo turin a chah bawk.

Pu R.Lalvena, Secretary chuan Accurate statistics leh Data bakah lehkhaa indawrn te tihzangkhai a nih theih nan E-Mail hman tangkai dan tur ngaihtuah tul a tih thu leh zirtirtute chanchin chipchiar taka hriat a pawimawh thu sawiin Officer- te chu taimawk chhuah lehzual turin a sawm bawk.