Nimin June 26 chawhnu dar 3:00 khan Serchhip District Level Coordination Committee on Mizoram State Rural Livelihood Mission chu, Chairman leh District Bawrhsap ni bawk Pi Juhi Mukherjee IAS hovin ama pisaah a vawikhatna atan an thukhawm a, thawktu MzRLM team-te bakah DRDA Project Director Pu F.J. Liantluanga MCS leh Serchhip khaw chhunga Bank awm zawng zawnga an branch Manager theuhte an tel a ni.

NRLM hi Mizoram-ah chuan a bul tanna atan Serchhip leh Kolasib District chhunga Block pali thlan bikah te Pilot Project hi neih a ni a. Tunah hian Serchhip Distric chhungah chuan Self Help Group Primary Level Federation khaw 16-ah din a ni tawh a ni. He programme hi Serchhip District chhunga RD Block pahnih, East Lungdar Block leh Serchhip Block-ah te chak taka hma lak mek a ni a, he meeting-ah pawh hian Self Help Group ten harsatna an tawh tlanglawn ber; bank nena an inlaichinna lam an sawi ho ber a ni.

National Rural Lively Mission hi Central Sorkarin World Bank Project atanga thingtlang mite chawikanna atana programme a siam a ni a, Self Help Group te behchhana tanpuina leh chhawmdawlna pek a, eizawnna ngelnghet an neih theih nana kawng kawhhmuh tumna a ni.