Vawiin khan Parliamentary Secretary Pu Joseph Lalhimpuia chuan Mizoram State Cooperative Union (MSCU) General Assembly vawi 27-na Archive Hall, Babutlanga neih chu khuallian niin a hmanpui.

Pu Joseph Lalhimpuia chuan Cooperative Society chu pawlho hmanga midangte tanpuitu leh thawhhona hmanga, a huhova mimal hmasawnna thlentu, awlsam taka din theih, chan leh hloh tur awm lem lo a ni a; chutihrual erawh chuan sum leh pai mamawh zat neih theihlohte, inrelbawl lama buaina te, member te duhdan leh phur dan inchen loh avang te erawh chuan harsatna tam tak a awm ve thei thung, a ti. Society ah chuan member te’n an tihtur an tih chuan pawl in hma a sawn a, an tihloh tur an tih erawh chuan pawl pumpuiin a chhiat phah thei tih hre thar leh turin kalkhawmte a sawm a. Sorkar chuan duhsak takin Cooperative Society te a enkawl a, sum tam tak a sen mek lai hian Society member-te pawhin an mawhphurhna hlen chhuak ngei tura chahin Mizorama sum pai thawhchhuah dinhmun tehna GSDP ti sangtu nih tum turin a fuih a. MSCU chu training, seminar, workshop leh research programme a lo buatsaih thin chhunzawm a, uar lehzuala midangte thawhho zirtirna lamah ke pen turin Parliamentary Secretary chuan a chah a ni.

Mizoram State Cooperative Union hi 29.03.1975 khan din tan niin State huap society leh federation te zinga upa ber a ni. A dintirh atangin thawhho dan inzirtirna training leh education lamah nasa takin tha a thawh a, tun thlengin chu hna chu ngawrh takin a thawk chhunzawm zel a ni. Tun dinhmunah thawktu mi 32 awmin Cooperation Department Chief Executive Officer in a enkawl a ni.

Kum 2013-14 chhung khan hmalakna hrang hrang a kalpui zinga langsar zual thenkhatte chu - thingtlang khua a primary society 69 te tlawhin member 1183 te leh Aizawl khawpui chhungah society 8-a member 65 te tana zirtirna programme buatsaih an chhim a; ICM, Gauhati nena tangkawpin training programme buatsaih a ni a; Aibawk, Keifang, Farkawn leh Reiek ah te seminar neih a ni bawk. Cooperative Tlangau chanchinbu chu tha taka tihchhuah a ni bawk.