Vawiin chawhnu dar 1:00 khan Saikuti Hall Lungleiah HPC, Students Incentive Cash Award semna inkhawm neih a ni a, HPC Vice Chairman S.Laldingliana chu khuallian a ni, Pu C.Zairemthanga, Chairman Selection Committee in a kaihruai.

HPC Vice Chairman Pu S.Laldingliana chuan thu sawiin, Lunglei leh chhim lam zirna lamah kan hniam sawt hle a, engtinnge tan kan lak thar ang tih kan ngaihtuah a tul hle a ni tiin, tun hma kan pi leh pu, kan nu leh pa te hunah khan chhim lamah thluak a awm an ti thin a, chhim lam atangin mithiam tam tak an lo chhuak tawh thin a, vawiinah erawh Lunglei leh chhim lam atangin mithiam IAS, MCS, MPS a tling thei an khat ta pharh mai a, an hnung zui tur kan tlem ta em em mai hi a chhan chhui chhuah ngei a tha in ka hria a ti a. Zirlaiten kan zirlai aia ngaihpawimawh kan neih thin avangin kan thlen phak tur ang kan thleng pha lo fo thin a ni. Zirlai nih laia khawtlang leh kohhran lama inhman te pawh a tha a, mahse kan zirlaiin a tuar dawn anih chuan kohhran leh khawtlanga kan inhmanna te kan dahthat thiam a tha hle . Hetiang kawngah hian Mizote hian hnamdang kan pha lo deuh niin a lang a, hnamdang vai kan han tih te pawh hi an tihthat theih em em na leh an thiamthei bik nia kan hriat fo na hi chu zirlai an nih chhungin an zirlai bak thil dang an ngaihtuah lo emaw tih turin an zirlai tih takzetin an ngaihtuah thin vang a ni.

Pu S. Laldingliana chuan tunlai khawvel hi chu mithiam chungchuang te dinchhuahna khawvel a ni tawh a, thiamna tak tak nei lo B.A, M.A tih vel tan chuan hna a awm tawh lo, sorkar pawhin hna a lak dawnin a thiam te chauh a la tawh thin a ni. Chuvangin khawvel competition hma chhawn ngam tur khawpin thiam tum ula, written exam hmachhawn ngam turin inbuatsaih ang che u tiin zirlai kalkhawm te a fuih bawk.

HPC Student Incentive Cash Award hi kum 2013 atang khan sem tan niin zirlai titha engemawzat te hnenah Rs.nuai 1, sem ral thin a ni a, kuminah pawh hian cheng nuai 1 sem ral leh a ni a, nakum lamah erawh cheng nuai 2 sem ral a ni tawh thung dawn a ni.

Vawiina HPC Incentive Cash Award sem hi category hrang hrangah then niin, State level HSLC leh HSSLC top ten mi panga te hnenah Rs.2,000/- theuh hlan an ni a, Highest Mark mi 2 te hnenah Rs.2,000/- District Level Top ten te hnenah Rs.1,200/- theuh hlan an ni bawk a ni. Vawiina zirlai titha Awad hlan zawng zawng te hi an vaiin mi 68 an ni.