Vawiin hian Serchhip District Development Co-ordination Committee (DDCMC)/ DISHA tia koh bawk chu an Chairman Pu CL Ruala, MP Lok Sabha leh Co-Chairman Pu Ronald Sapa Tlau, MP Rajya Sabha te nen an thukhawm a. He meeting hi Co-Chairman Pu Ronald Sapa Tlau chuan kaihruaiin kum 2017-18 chhunga Central sawrkar sum hmanga Serchhip District chhunga hmasawnna hnathawh hrang hrang te an thlirlet.

Meeting kaihruaitu, DDCMC Co- Chairman Pu Ronald Sapa Tlau chuan, Department hrang hrang hotute leh tlawmngaipawl hruaitute kutah Serchhip District hmasawnna hnathawh a innghata, he dinhmuna ding mek zawng zawngte; in hun tha neih hi thil tha, thil tangkai leh hriatreng tlak thawh nana hmang turin ka ngen che u a. Nangnin in thawh that phawt chuan Serchhip District hmasawnna hnathawh a tha tihna a ni, tiin member te a fuih a. DDMC Chairman Pu CL Ruala pawhin DDCMC thutkhawm hun an neih tlai hlek chhan sawifiahin a hun atana Central sawrkarin a ruat leh Parliament Session a thlen rual vang te, President leh Vice President thlanna ten an nanchin chhoh zel vang te a nih thu a sawi a. Hei vang hian meeting vawi khatna leh vawi hnihna chu kawp a ngaih phah thu a sawi a ni. CHutihlaiin Mizoram chu DDCMC hmalaknaa India rama a titha berte zinga mi kan nih thu a tarlang bawk.

Vawiina meetingah hian tun 2017-18 sawrkar kum kal meka Central sawrkar sum hmanga hmasawnna hnathawh hrang hrang report en hova sawi ho a ni a. Serchhip District chhunga hmasawnna hnathawh langsar zual leh an dinhmun chu hetiang hi a ni.

IWMP Project hrang hrang kalpui mekah kumin atan Project II hnuaia mamawh Fund chauh hmuh a nih dawn avangin Project III a hna kal lai mek leh Project II ah chuah lo hi chuan hnathawh theih a nih dawn loh avangin Project dangte chu chawlh lailawk a ni dawn a. Kumleha Fund hmuh dan a zir zelin chungte chu tihnun zui tur a ni. He hmalakna avang hian chhungkaw tam takin kumtin tlangram lovah eizawnna an bansan tawh hlawm a. Hmalakna kalpui thui tawhna, Project 3 & 5 chhungah ringawt pawh loneitu chhungkaw 38 ten tlangram loneih an bansan tawh a ni.

BADP sum, 2016-17 chhunga lokal Rs. 217 Lakh chu tunah hian thawh zawh vek tawh a ni a, kum 2017-18 ah hian hetiang zat vel bawr bawk hi lokal tura beisei a ni bawk. BADP sum hman dan tur chungchangah hian Central lamin hmalak hmasakna tur indawt (priority list) thar a nei a, an ngaihpawimawh dan indawt hi ramri atanga an hlat zawng atanga teh tur niin First Priority chu Border atanga km 10 a hla area a ni a. Serchhip District ah chutiang khua chu Sailulak leh Lungkawlh chauh an nih avangin 2017-18 Fund hi he khaw pahniha hman tura ruahman a ni a, kum lehah second priority; an ni aia ramri hnaihlo deuh zawk khuaah hmang chho zelin a indawtin hman chhoh tawh tura ruahman  a ni.

Ni za inhlawhnaah hian kumin chhung atan Central chuan ni 51 inhlawhna Mizoram tan a approved a, heng zingah hian Serchhip District ah ni 37 inhlawhna siam tawh a ni.

Mirethei in sak sakna, PMAY-G) ah hian Serchhip Block ah target 36 leh E. Lungdar Block ah target 19 a awm mek a. Tun dinhmunah fund dawn la nilo mahse reiloteah fund hi a awm thuai beisei a ni.

Zirnna lamah 2017 chhungin Primary School naupang 1900, Middle School naupang mi 3278 te hnenah free text book pek an ni a. School Uniform hi P/S leh M/S School naupang 4067 hnenah pek an ni bawk. Teacher Grant zirtirtu mi 597 hnenah pek an ni a, chetphunga harsatna neite tan School 33 ah toilet sak zawh a ni bawk. Tin, zirtirtu indaihloh zualna school 5 ah Trainer pakhat theuh dah thar an ni.

Hriselna lamah kumin chhungin naupiang 167 awmin an zinga 3 hi an boral a, Infant Mortality Rate hi 10.9 a ni. Nau nei nu 167 zinga 137 te hi JSSK hnuaia nau hring an ni a, JSY Fund dawn hnuhnung ber leh a dawttu inkara nu nauhring, JSY hnuaia in registered hi 519 an ni thung.  Kumin chhung hian mi 3246 exam atangin Malaria vei mi 3 chauh hmuh chhuah an ni a, Annual Parasite Index pawh 0.04 chauh a ni. DDT kah ngaihna khua, Malaria Case mi 1000 zela pahnih aia tam awmna khua hi khaw pakhat chauh a awm a ni.

National Social Assistance Programme hnuaiah tar pension mi 1570 pek mek an ni a;  hmeithai pension hi mi 164 pek mek niin Disable Pension mi 47 hnenah pek mek an ni a. National Family Benefits Scheme tanpuina dil mi 21 lut tawhin hun remchang hmasa berah an dawng thei tur ngaihtuaha thutkhawm tur a ni.

National Rural Drinking Water Programme hnuaiah Khawlailung khaw tuilakna thawh zawh tawh niin hawn mai theiha peih a ni a, Swachh Bharat (Gramin) hnuaiah Solid Liquid Waste Management hmalakna in khaw 12 ah hnawmpaihna thawh tur a ni a. Swachh Bharat Kosh hnuaiah inthiarna chhe tawh mi 1346 te chu a thawmthatna pek an ni bawk.

Inkalpawhna kawng hmalaknaa PMGSY hnuaiah Chhingchhip to Thentlang 67%, Hmuntha to Khawbel 43%, Chhingchhip to Hualtu 83%, Chhingchhip to Hmuntha 71% leh E Lungdar to Sailulak 66% zawh tawh an ni a. Heng kawngte hi target revised angin 2017 December thlaa thawh zawh vek tura ruahman an ni.

Vawiina meeting ah hian Chairman leh Co-Chairman te bakah Member Secretary aiawh Pu Chuauhnuna, MCS, Addl DC te, Pu VL Remliana, MCS, Project Director, DRDA te leh DISHA member Official pawimawh te, YMA, MHIP aiawh leh Village Council member te an tel a ni.