2576/2023-2024

Dated Serchhip, the 1st November, 2023: November ni 7, 2023 a inthlanpui lo awm turah Serchhip District Election Office chuan inbuatsaihna chak takin a kalpui a. He inbuatsaihna kal zelah hian Polling party te leh BLO te, Expenditure agent te leh inthlan kaihhnawiah official pawimawh te tan training a buatsaih a. Vawiin khan Expenditure Observer Pu Umesh Phade leh Serchhip District Election Officer Pu David Lalthantluanga hovin Expenditure Agent te tan training buatsaih niin Block Level Officers te tan Serchhip Meeting Hall ah training buatsaih a ni bawk.

Pu Umesh Phade hian vawiin chawhma khan candidate hrang hrang expenditure agent theuh te a ko khawm a. Election Commission of India thupek angin inthlan senso atan Mizoram chhunga MLA candidate ten nuai 28 aia tam sum leh pai an hmang tur a ni lo, tih a ni a. Candidate te sum hman dan fel taka vawng a, ziak lut thin tu tur Candidate tin ten Expenditure Agent an nei theuh a. Candidate te sum hman dan an ziah luh leh District Election Office in Shadow Observation Register a candidate te sum hman dan an ziah luh chu a inmil em tih hun bi neia en thin a ni. Vawiin khan Expenditure Agent ten tihsual an nei em tih te endik a ni a. ECI duhdan anga Accounts vawn dan inhrilhhriat nawn leh a ni bawk.

Vawiin vek khan BLO te tan nilengin training buatsaih a ni a. Election Officer Pu Lalrinsanga Hnamte chuan training hi a kaihruai a. 26-Serchhip ARO leh SDO (Sadar) ni bawk Pi Rebecca Laldinmawii Hrahsel, 27-Tuikum ARO leh SO ni bawk Pu Gaston Vanlalhriatpuia leh Pu Lalrinsanga Hnamte te chuan Vote thlak ni a BLO te mawhphurhna chi hrang hrang chip chiar takin an zirtir a ni.