3247/2022-2023
Dated Serchhip, the 13th January, 2023: Vawiin khan Serchhip DC Meeting Hall ah Serchhip District Final Electoral Roll, 2023 chu Pi Nazuk Kumar, IAS, District Election Officer chuan tlangzarhna a nei.

He hunah hian Pi Nazuk Kumar chuan Roll bu thar hi Party hrang hrang aiawh lokal te hnenah a hlan a. Final Roll a district dinhmun tlangpui a sawi lang bawk. Final Roll felfai tak a awm theih nana thawktu zawng zawng, Booth Level Officer te, khaw tina Party aiawhte leh Village Councils memberte chungah lawmthu a sawi a. Tha taka kan ERO leh AERO te in lo thawhpui avangin Final Roll thianghlim leh felfai tak kan tlangzarh thei a ni, a ti. Engemaw thil fel lo leh siamthat ngai an neih apiangte hrilh hre thin turin a chah bawk a ni.

Pi Lalrinchhani Ralte, Election Officer, pawhin thusawiin Election Department hmalaknaah te a thawhpui that thin avangin Political Party, tlawmngaipawl leh khawtlang hruaitute chungah lawmthu a sawi a. Inthlanpui kum te kan lo thlen leh tawh avangin a bik takin Party hrang hrangte kan inkovin kan inngen leh chamchi dawn a, in thawhpuina kan mamawh leh nasa hle dawn a ni. Tha taka a tulna apianga min thawhpui zel turin ka sawm cheu a, vawii na kan tlangzarh tak Final Roll kan puitlin theih nana min thawhpuina zawng zawng pawh kan lawm tak zet a ni, a ti.

Final Roll-a a lan danin Serchhip district ah hian General Elector mi 53388 awmin an zinga 25933 hi mipa an ni a, a dang 27455 hi hmeichhia an ni. Heng bakah hian Service Voters 419 an la awm bawk a, chungte nen chuan District total hi 53807 an ni. Serchhip district ah hian Constituency bial pathum an awm a, Serchhip bialah voters 20187 awmin an zinga 9493 hi mipa an ni a, hmeichhia 10694 an awm a. Tuikum bialah hian voters 16723 awmin an zinga 8301 hi mipa an ni a, hmeichhia 8422 an awm a, Hrangturzo bialah hian voters 16478 awmin an zinga mi 8139 hi mipa niin hmeichhia 8339 an awm a ni. Thla hmasa mai khan Draft Roll tlangzarh a ni a, Draft Roll ennawn lai khan Roll atanga paih zawng zawng hi voters 1012 an awm a, an zinga 514 hi mitthi niin, 418 insawn an awm a, mi 80 awmnawn an awm bawk a, heng ho te paih takte chu an ni. Paih tur zawng zawng paih hnua Final Roll a voters punna hi 481 a ni. District chhungah hian Polling Station 88 a awm mek a ni.

Final Roll tlangzarh takah hian siamthat ngai leh sawisel duh neite tan siam that zui theih a ni dawn a, inthlanpui thlen hma hian Roll Publication hi la awm leh hman tura beisei a ni.

Roll tlangzarhnaah hian Pu Lalmuansanga Ralte, Deputy District Election Officer leh bial hrang hrang Electoral Registration Officer te, Assistant Electoral Registration Officer te, Party hrang hrang aiawh leh mi pawimawh dangte an tel a ni.