Vawiin a Serchhip khawpui leh Thenzawl khua a sawrkar hmalakna hmun tlawh tu, Mizoram Governor Lt.Gen(Rtd.) Nirbhay Sharma chuan an nupa puala vantlang inkhawm, Serchhip DC’s Conference a neih ah Serchhip District chu ziak leh chhiar thiam tamna, District ralmuang, hmun rualrem leh sawrkar hmalakna hrang hrang te entawn tlak khawp a tihhlawhtlin theihna hmun nia a hriat thu a sawi.

A sawizel na ah mipui 64,875 chauh chenna, ziak leh chhiar thiam 98.76 % lai awmna ni bawk si hian Bawrhsap leh Superintendant of Police thothang tha tak te hnuaiah District dang 7 te entawn tlaka hmasawn a harsat lovang a ti a. Skill development, Education leh Healthcare ah District entawn tlak , Role Model District ni turin tlawmngai pawl, kohhran leh Serchhip District mipui ten sawrkar finchhuah a tawiawm zel turin a chah a ni.

Digital Connectivity chungchanga harsatna te chu a theih anga lo pui a duh thu a sawi a. Telecom Service Providers ten Tower phun belh chungchanga an harsatna te pawh khua leh tui ten vantlang thatna tur ngaihtuah zawka mahni hlawk lohna tur te pawh tuar ngam a, Phone Networks Service petute lo dawngsawng tha turin a ngen a ni.

Ziak leh chhiar thiam ringawt a tawk lova, chhawrtlak leh rawihtlak thiamna a pawimawh zawk a ni tiin ram chhung bakah ram pawn thlenga hna hmu tur chuan hnamdang tawng tun aia Mizo thalai ten an uar sauh sauh a ngai a ni a ti a. Hindi thiamna tello chuan Mizo thalai thiam tak tak te thiamna te chu India ram chhungah tangkai zawka chhawr a ni thin lova. Hindi Mizo thalai ten an thiam a ngai nasa a ni tiin Assam Riffles leh BSF te thleng a thawpui nachang hre thin turin District Sawrkar thuneitu te leh vantlang hruaitute chu a chah.

Doctor indaihlohna chu pawi a tih thu sawiin Doctor awm chhun te tangkai zawka, mipui in an chhawr theih nan Doctor te an pawimawh ber a. Rawngbawlna thinlung pu in thingtlang ah te damlo kan tur in pen chhuak thin se a lawmawm hle ang a ti. Pi leh pu te atanga inhlan chhawn ramhmul damdawi te pawh Mizoram ah tam tak a awm tih a hriat thu sawiin khawvel in ramhmul damdawi that zia a hre chiang telh telh a ni a ti.

Thenzawl hmunah Tourist Complex sak mek chu Mizoram tan malsawmna a nih theihnan leh khualzin tam zawk te tana pan chak a nih theih nan Serchhip District mipui te, a bik takin Thenzawl mipui te, chu khualzin chunga that chhuah turin thiamna an zir mek em, an nei tawh em tih te an in enchian a ngai tan tawh a. Khualtha thleng tura thiamna, Hospitality and management a training nei turin thalai tam tak an tirh a ngai tawh a ni a ti. Ramdang khualzin Mizoram raw tlawh tu ten Five Star Hotels duatna leh duhsakna ang an phut lova, an phut ber chu Mizo te khawsakdan anga Mizo te chenna In ah te thlen, hawihhawmna nena dawnsawn leh thianghlimna a ni a ti.

Governor puala inkhawm DC’s Conference Hall ah hian Serchhip Bawrhsap Dr.Lalrozama leh Serchhip Superintendant of Police Pu Lalringdika ten District Profile an tarlang a. Report a ziahlan dan chuan Serchhip District ah pawikhawihna liantham, hel hmalakna leh dan bawhchhiatna liantham hrang hrang kum in chhunga thleng, sawi tham a awm lo a ni. Serchhip District ah hian Sub – Division 3, RD Block 2, Legislative Assembly Constituency 3, khaw 56, Cllege 1, HSS 7, H/S 36, M/S 99, P/S 116 bakah District Civil Hospital 1 a awm mek bawk a ni.

Governor hian JN Hospital leh Eklavya Residential Model School, Serchhip a mi te, Handloom Exhibition Hub, 50 bedded Ayush Hospital, Jawahar Navodaya Vidyalaya (School), Thenzawl te a tlawh nghal a ni.