Election Commission of India thupek anga Special Summary Revision, 2016 Tripura Bru Transit Camp-a Bru (Reang) awmte an awmna hmuna kal chilh a, Summary hearing hnathawk tura kal turin inbuatsaihna kalpui zel a ni a, Nimin Dt 9.11.2015 a Election Official kalchhuak tur te mipuiin an dan avanga an kal tlang theih loh hnu in vawiin khan Official te hi DC Office atangin Transit Camp pana kal turin chhuah an tum leh a, amaherawhchu DC Gate bulah All NGO’s and All Political Party kaihhruaina in mipui tam takin an lo dan leh avangin an chhuak leh thei ta lo a ni.

Vawiin Dt 10.11.2015 zing dar 9:30 a Special Summary Revision, 2016 hna thawk tura kal tur Election Official D.C gate bulah mipui tam takin an lo dan leh naah hian, official aiawhin Pi Lalbiaksangi, Mamit District Bawrhsap/District Election Officer leh Pu C.Lalnunmawia, Superintendent of Police, Mamit te chuan mipui te hnenah hian ngenna siam lehin Election Commission of India in thu a pek anga revision hna kalpui tur an nih angin mipuite chu an hna an thawh theihna tura kawng kian hram turin an ngen a, hei hian awmzia a nei thei ta lo a ni. Mipui pungkhawm hian Police duty te hi an tam hneh bakah pitar/putar, hmeichhia leh nunau thlengin hma an hruai avangin Police thahrui hman ngam ni a hriat a ni lova, suttlang an ni ta lo a ni. Hetih lai hian All NGO’s Coordination Committee and All Political Party hruaitute hian Pi Lalbiaksangi, District Bawrhsap chu a Pisa-ah hmu nghalin inkawm hona neih a ni a, an dinna ngaiah a tawp thlenga din tlat an tum thu District Bawrhsap hi an hrilh a ni.

Thil awmdan hi hotu sang zawk hnenah thlen a ni a, chhanna nghah mek a ni.

Pi Lalbiaksangi, District Bawrhsap, Pu C. Lalnunmawia, SP, Mamit leh Pu C.Lalsangluaia, SDO(Sadar) te chuan mipui tena Election Official te kal thei lova an danna hmun hi an awm chilh reng a ni.