Vawiin hian Serchhip Bawrhsap Pisaah Bawrhsap Dr. Lalrozama, IAS leh Dr. K. Lalbiakzuala, Director, Health and Medical Education; leh official pawimawhten Serchhip District Hospital thar (Extended District Hospital) sak hna bul tan thuai a nih theih dan tur an rel.

Dr. Lalrozama chuan, damdawiin tha, mitinin kan mamawh ngawih ngawih min pek tumin sawrkarin hma a la mek a. A dawngtu tur leh chhawrtu tur mipuiten rilru inhawng leh phal taka kan lo dawn a ngai a, ram pawh an mamawh khawp kan lo ruahman a, rang taka kan lo chin fel sak a tul a ni. A sakna hmun tur atana Department lamin an duh te hriat a nih chuan khawtlang hruaitute leh tlawmngaipawlte pawh a hma lama a sawipui tur thu a sawi a. Serchhip hmasawnna duhtute vek kan nih avangin khawi hmun pawh Department chuan thlang se harsatna a awm a rin loh thu a sawi a ni.

Dr. K. Lalbiakzuala pawhin thu sawiin, sawrkar laipui lam te District Hospital tha leh changtlung min pe turin an inhawng em em a, ruahmanna siam thuai turin min rawn hrilh fo a ni. Tin, chutiang District Hospital tha chu nakin lawka Medical College atana upgrade mai theih tura duan nise tih thlengin an duh nghe nghe a ni. Chutiang District Hospital sak nan chuan Serchhip hi a rem hle a, Department lam pawh kan inhawngin kan phur hle a ni. Amaherawh chu Hospital tha leh changtlung tak sa tur chuan ram mamawh a zau a, khum 200 emaw a aia tam emaw dah theihna ngei sak a tul a ni. Tin, tui lakna thate, a panna kawngpui tha te, Quarters engemawzat sakna tur te, Damdawi dawr leh khualbuk te leh nakin lawka Air Ambulance hman theihna tur thlenga a awm theihna lo inbuatsaih lawk a tul a ni, a ti. Planning Department in tunah hian ruahmanna thehlut turin min nghak mek a, hun remchan laia kan mamawh khawp ram ruahmana, Survey leh hmalakna tul hmasa dang kalpui thuai a tul tawh a ni, a ti.

Vawiin meeting ah hian Pu R. Vanrengpuia, SDO Sadar, Pu K. Saitluanga, IPRO, Pu Lalremruata Sailo, ASO leh Dr. Laldawngliana Sailo, CMO te bakah sawm bik mi thenkhatte an tel a ni.