Vawiin chawhma khan naupangte hleilenna laka venhimna inzirtirna, Child Protection Training, I&PR Auditorium-ah neih chu Pu Joseph Lalhimpuia, Parliamentary Secretary for School Education chuan khuallian niin hun a hmanpui.

Parliamentary Secretary chuan naupangte venhim beihpui thlak hawnnaah hian thu sawiin, naupang pawisawi lo chunga hur sualna leh tharum hmanga nun rawnna hi thil huatthlala ber a ni a, hetiang laka naupang venghim tur hian kan zavaia kan tanrual a ngai a ni, a ti a. Naupangte hi hnam rohlu an ni a, anmahni venhim hi mitin mawhphurh a nih thu sawiin,  training-a kalkhawm zirtirtute chu anmahni school theuhva naupangte venhim hnaah Nodal Teacher for Child Protection ruat an nih thu leh an mawhphurhna hlenchhuah a pawimawh thu a sawi bawk. Pu Joseph Lalhimpuia chuan naupang ten an hun tha ber chu school-ah an hmang a, nitin darkar 5/6 vel zirtirtute bulah an khawsak avangin anmahni enkawl hnaah zirtirtuten theih tawpa tan an lak chuan a tangkai hle dawn a ni, a ti a; zirtirtuten an zirlaite an puih that chuan naupangin huaisenna, taihmakna leh tumruhna an nei theih thu leh, chu chu naupangte himna atan a tangkai thu a sawi bawk.

He programme, hleihlenna laka naupangte venhim beihpuithlak hawnna leh training hi District Child Protection Unit, World Vision, SCERT leh Mizoram Primary School Teacher Association-a State Women’s Network te buatsaih a ni. Women’s Network Sub. Hqrs. hi Aizawl East leh West-ah te din a ni a. March 9, 2 017-ah Aizawl East huamchhung hmun 18 ah a rualin beihpui thlak leh tum a ni a, thingtlang lamah pawh inzirtirna hi pek vek an tum a ni.

Vawiina beihpuithlak inkhawmah hian Aizawl East huamchhunga Primary School zirtirtute an kalkhawm a, naupang laka hleihlenna lama mithiam sawm ten zirtirna an pe a ni.