Information & Public Relations Minister Pu Lal Thanzara chuan Tuichawng Group YMA Conference vawi 23-na Vathuampuia neih chu nimin khan a hmanpui.

Pu Lal Thanzara chuan Mizoram khua leh tui dik takte chuan Mizoram lo chu ram dang kan nei lo va, Zo hnahthlakte lungrual taka kan chen hona atana Pathianin min pek Mizoram humhima nuam taka siam chu a chhunga cheng khua leh tui dik takte tih tur a ni a, inngeih lo va, intai a, inen hrang thei kan ni lo, a ti a. Kumpinu hun lai atanga Mizorama awm tawh Chakma leh Bru thlah kal zelte chu a ram mi dik tak an ni a, dan kalha Mizorama lut rute erawh he ramah hian an awm ve a rem lo tih sawiin, state thenkhat chu an harh chhuah tlai avangin chim ralin an awm mek a, chim ral kan nih loh nan tan kan lak a ngai a ni, a ti. YMA chu tanpui ngaite tanpui a, mi harsa leh chhumchhiate dawm kang a, nunphung dika mipui hruaitu a ni tih sawiin, Pu Lal Thanzara chuan missionary-te din a nih avangin YMA chuan malsawmna pawh a dawng nasa a, sawrkar programme leh policy tihhlawhtlin kawngah pawh a thawh hlawk hle a ni, a ti a. Chutih rual chuan YMA member-te chu politics tuinua inlentir a rem lo, a ti bawk.

I&PR Minister Pu Lal Thanzara hi a nupui Pi Zohmingthangi'n a tawiawm bakah, Tuichawng Group YMA Conference hi Central YMA Treasurer Pu J.Lalsailova leh CEC Member pathum te'n an hmanpui bawk a. Conference hi zanin (Feb 23) hian palai thlahna hun hmangin a tiak ang.