2687/2023-2024

Dated Serchhip, the 6th November, 2023: Mizoram Legislative Assembly inthlanpui lo awm turah Serchhip District huam chhunga Polling Station 88 a duty tur Polling party-te chu tukin dar 8:30 atang khan an duty na hmun tur panin an chhuak tan a. Despatch Centre hi DC Office tualzawlah ruahman a ni. Serchhip District Election Officer Pu David Lalthantluanga, Addl District Election Officer Pu Lalnundika, SDO (Sadar) Pi Rebecca Laldinmawii Hrahsel leh Election official dangten Polling Party kalchhuak te hi an buaipui a ni.

Polling Official te hi a tahtawlin an bungraw ken tur uluk taka tihfel sak an nih hnuah Polling Station panin an chhuak a. Serchhip khawpui atanga Polling Station hla ber chu 22 Sailulak Polling Station niin Despatch Centre DC Office atang hian 79.05 km a hla a ni. 27-Tuikum a duty tur Polling Party 8 leh 28- Hrangturzo a duty tur Polling Party 7 te chu a chhuak hmasa berah an tang a. 26-Serchhip Polling Station hrang hranga duty tur ten a hnung an khar a ni.

Tarlan tawh thin angin Serchhip District Assembly Constituency 3 ah hian Polling Station 88 a awm a. Tun inthlana hman tur E-Roll thar bera a lan danin Polling Station 88 zinga voters tamna ber chu 22 Serchhip XII niin voter 976 an awm a. Voter tlemna ber Polling Station chu 31-Vanchengte niin voter 95 an awm a ni.