Vawiin hian District Level  Authority on The Mizoram Government Land Pooling & Management  Scheme , Serchhip district te chu an Chairman Dr. Lalzirmawia Chhangte, IAS, bawrhsap ni bawk hovin DC Meeting Hall ah an thukhawm a, district chhunga sawrkar ram enkawl dan tur an rel.

Dr. Lalzirmawia Chhangte chuan, sawrkar department thenkhat, ram nei zau tak hmang tangkai silo an awm laiin, department thenkhat ram mamawh em em, ram nei silo te kan lo awm thei bawk a. Sawrkar pakhat hnuaia mi vek kan nih si avangin heng department hrang hrang ram te hi chhun khawma, mamawh tawk ang zela hman tangkai dan thar sawrkar chuan a rawn duanga, State level authority  leh  district level authority te dinin; vawiinah a vawi khatna atan kan thukhawm ta a ni, a ti a. District Level Authority hi Estate Management Cell, DC office a din tur ten an puibawm dawn a ni.

Member Secretary Pi C. Lalduhzuali, SDO, Sadar chuan The Mizoram Government Land Pooling & Management Schemes chungchang leh District Level Authority te mawhphurhna sawifiahna a nei a, District Land Revenue & Settlement Office atanga department hrang hrang te ram neih dan an lo lakkhawm tawh chin te pawh report nghalin, hmun 53 a sawrkar ram pass an chhinchhiah tawh thu a sawi a, department thenkhat an hmunpui lama pass enkawl an awm nual avangin a la pung chho zel dawn a ni, a ti.

Vawiina meeting hian office hrang hrang te chu March ni 31 ral hmaa an ram neihte fel taka report hman turin a ti a ni.

Mizoram sawrkar hian ni 14.09.2018 ah khan The Mizoram Government Land Pooling and Mangement Scheme hman chungchang hriattirna hi a lo tichhuak tawh a, ni 11.11.2019 ah tlema siam rem niin he dan hmang hian sawrkar department hrang hrang ram neih te chu chhungkhawm (pool) in General Administration Department chuan mumal leh tangkai zawka hman theih turin a enkawl tawh dawn a ni.