Tunlaia Coronavirus natna leng mek laka lo invenlawkna leh inpuahchah dan ngaihtuah ho turin nimin tlai khan Lunglei District Task Force on Coronavirus chu an Chairman Lunglei DC Pu V.Lalsangliana, IAS hovin Lunglei DC Conference Hall-ah an thukhawm. Task Force-ah hian H&FW Department thawktute bakah Lunglei District Department hrang hrang hotute leh Block tin BDO-te leh tlawmngai pawl aiawhte an tel a ni.

Meeting-ah hian Coronavirus natna laka lo inpuahchah lawkna ‘Preparation Plan for Coronavirus Outbreak for Lunglei District’ chu Dr Thani Pachuau, CMO Lunglei in sawifiahna hun a hmang a. Lunglei DC hovin February ni 8, 2020 (Saturday) khan Coronavirus chungchangah Emergency Meeting neih niin Task Force member turte ruat an ni a. Tin, India leh Bangladesh ramri depa awm, Kawrpuichhuah Lunglei District-ah 10th February, 2020 (Monday) atang khan Screening hna kalpui turin Medical Team duty tur dah an ni a. Ramri kaltlanga veivak leh khualzinte endik hna hi kalpui mek zel niin February ni 16 thleng khan mi 118 screen tawh niin tun dinhmunah Coronavirus vei la hmuhchhuah an ni lo. Meeting chuan Screening na hmun pakhat neih belh relin a Screening Point hi Tlabung SDO(C) Pu Lalsanglura kaihhruaina in ruahman belh ni se tih a rel a. Sub Divisional Task Force on Coronavirus din ni se tih meeting-hian a rel bawk a ni.

Tin, State Level Task Force on Mitigation of Corona Virus in a phut angin International Border bulhnaia khua ah te Awareness Campaign Gram Sabha nei tura a tih angin Lunglei District-a khaw 19 thlanchhuah ah te Doctor leh Nurse te zin kualin zirtirna hun an hmang dawn a. Hemi bakah hian School Education Department leh H&TE Department-te nen tangkawpin zirlaite tan awareness campaign hi neih ni bawk se tih rel a ni a. Tin, a tul angin thuziak (Leaflet) leh Video Clip te pawh buatsaih a ni ang.

Lunglei District-ah Coronavirus vei hmuhchhuah lo awm ta se rang taka chet la thei tur ‘Rapid Response Team’ ruat an ni bawk a. Hengte hi Lunglei District SMO leh District Surveillance Officer ni bawk Dr Lalrinthangi, Dr Isak Lallawmkima, MD Specialist, Pi C.Lalzami, District Nursing Superintendent, Pu Lalruatkima, CMO Office leh Medical Mobile Unit Team (6 Nos) te an ni. Coronavirus vei anlo awm anih chuan anmahni dah hranna tur “Isolation Ward” pawh ruamhan tawh niin Lunglei District Hospital-ah khum panga (5) leh Tlabung Sub Division Hospital-ah khum pathum (3) ruahman tawh a ni. Isolation Ward-a duty tur te pawh ruat lawk an ni tawh a. Tin, hmanrua leh damdawi mamawh tur te pawh ruahman mek zel a ni. District Task Force on Coronavirus hi hmalakna thlirhova hmachhawpte sawiho turin July 2020 thleng thla tin an thukhawm dawn a ni.

Meeting-ah hian Dr Isak Lallawmkima, MD Specialist-in Coronavirus chungchang zirtirna Powerpoint presentation hmangin a nei a. He natna laka invent theih nana pawimawhte chu hengte hi a ni:

1. Chaw ei dawnah kut fait akin sil thin tur a ni

2. Kan khuh, hahchhiau in ka hup tur a ni a, kut fai taka sill eh tur a ni

3. Sa kan sawngbawl zawhah kut fai taka sill eh thin tur a ni.

4. Sa leh artui hmin tha taka siam chauh ei tur a ni

5. Damlohna nei emaw natna avanga thi ran reng reng sa ei loh tur a ni.

6. Kuh, khawsik leh thawk lama harsatna nei kana wm chuan damdawiin hnai berah a rang thei ang bera inentir nghal tur a ni.

Attachment

  • Loading attachment...