No.786/2021-2022

Dated Serchhip, the 2nd June, 2021: Vawiin hian Serchhip District Level Committee on Green Mizoram te chu an Chairman Pu Kumar Abhishek, IAS, bawrhsap ni bawk hovin Zoom Meeting kaltlangin an thukhawm a, kum 2021 Green Mizoram Day hman dan tur an rel.

Chairman Pu Kumar Abhishek chuan, kum dang anga meeting neih a rem chan loh avangin Zoom meeting hmanga committee buatsaih anih thu a sawi a. Green Mizoram Day 2021 pawh kum dang anga pung khawma hman a rem dawn loh avangin Covid19 invenna dan sawrkarin a duante zawm zel chunga kan hman a tul dawn a ni, a ti.

Pi Margaret Lalramchhani, Member Secretary leh DFO, Thenzawl ni bawk chuan kum kalta lama Green Mizorama hman dan te, kumina a hman dan tur ruahmanna awm thei tlangpuite report a pe hmasa a, chumi hnuah kumin June ni 11 a he ni lo thleng leh tur hman dan tur hi sawi ho nghal a ni.

Kumina Serchhip District Green Mizoram Day Hawnna inkhawm hi Thenzawl Golf Course ah, 11th June, 2021 zing dar 11:00am ah neih ni se, sawrkarin pun khawm a phal theih chin mi 30 pel lo turin a kal tur bik ruahmanna siam ni se, tiin an rel a. A Hawnna inkhawmah hian Pu. Robert Romawia Royte, Minister, Tourism, etc., chu khuallian tura beisei a ni. He hunah hian nikum lama kangmei ven lama thawk tha thlan chhuah khaw pathumte hnenah lawmman sem tur a ni ang a. A Hawnna inkhawm tawi neih zawhah Golf Course chhehvelah thingphunna hun tawi neih zui a ni ang.

Green Mizoram day pual hian sawrkar Department hrang hrangte chu a phunna hmun tur an neih chuan thing phun tura beisei an ni a, Thing tiak hi Forest department hotute hnenah ngaihven theih a ni ang.

Kumin Green Mizoram Day thupui chu: “Tuihna leh boruak tha siam nan thing I phun ang u” tih a ni.