3683/2023-2024

Dated Serchhip, the 6th February, 2024: Vawiin khan District Level Coordination on National Deworming Day leh District Task Force on Malaria Elimination meeting chu Chief Medical Officer Dr LP Malsawma kaihhruaiin CMO Conference Hall, Serchhipah neih a ni.

National Deworming Day hawnna programme chu February ni 9-ah New Serchhip Anganwadi Centre-I ah neih ni se tiin vawiin meeting chuan a rel a. He mi ni ah hian Serchhip District chhung hmun hrang hrangah naupang kum 1 atanga kum 19 inkar hnenah rulhut damdawi Albendazole chu a thlawna ei tir an ni ang. February ni 9-a damdawi ei ve hman lo te tan February ni 16-ah pek an ni leh dawn a ni. Rulhut damdawi ei hnua naupangin pum nuam lo deuh emaw insawiselna engemaw an lo neih thulha awlsam taka biak pawh theih tur Adverse Event Management & Emergency Response Team atan RBSK Mobile Health Team te ruat an ni bawk. Kum 2023 August thla khan Serchhip District ah naupang 99.35% hnenah damdawi hi pek an ni a. August, 2023 round ah hian Mizoram chu India rama ti tha ber a ni nghe nghe a ni.

District Task Force on Malaria Elimination meeting neih chhunzawm nghal a ni a. Malaria natna umbo tura Serchhip District chhunga hmalakna hrang hrang ngaihthlak a ni a. School ah leh tlawmngai pawl te zingah campaign vawi sawmsarih chuang nikum chhung khan neih a ni a. Ramriak te an riahna hmunah tlawhin zirtirna pek an ni a, chanchinbu leh aurinna kaltlang te in tum engemawzat malaria laka him dan inzirtirna pek a ni bawk. Kum 2023, January atanga December thleng khan Serchhip District ah malaria vei 47 hmuhchhuah a ni a, pakhat a boral a. Malaria vei hmuhchhuah tamna ber chu Thenzawl niin 16 hmuhchhuah a ni. Kum khat chhunga malaria vei leh vei lo endik hnem tehna annual blood examination rate (ABER) ah nikum chhung khan Serchhip District chu pakhatna a ni.

Vawiin meeting ah hian department hrang hrang Education, UD&PA, Social Welfare, I&PR, Fisheries leh Health Department hotute bakah tlawmngai pawl Serchhip Sub-Headquarters YMA hruaitute an tel a ni.