3684/2023-2024

Lawngtlai dated 6th February 2024: Vawiin chawhma khan Dr. Vanlalthlana, Minister, School Education Department chuan Lawngtlai khaw chhung a zirna in hrang hrangte tlawhin thawktute nen inkawmna hun a hmanpui a. Dr. Lorrain Lalpekliana Chinzah, Adviser to Chief Minister leh Pu T. Lalhlimpuia, MLA-ten Minister hi tawiawmin S.P, Lawngtlai, DIET leh Lawngtlai district School Education-a thawktuten an lo dawngsawng a ni.

DIET, Lawngtlai a tlawhna ah hian Dr. Vanlalthlana chuan DIET chu zirtirtu turte zirtir chhawn lehna hmun pawimawh tak a nih angin thiamna tak an zirtir chhuah ngeina turin leh dikna dinpui ngam tur a huaisenna an zir chhuahna hmun a hmang turin zirlaite leh zirtirtute chu a chah a. Ram leh hnam hmangaihtu ni turin leh hmasawnna kawng a kaihruaitu ni thei tur a ngaihtuahna hman a pawimawh thu leh thil dik lo tidiktu ni ngam turin zirlaite a fuih bawk a ni. Dik lo tak a thil tihna chuan rilru dawihzepna a thlen phah thin thu Education Minister chuan sawiin zirlai nih lai atanga dikna tan tlat ngam chu an puitlin thlengin mi huaisen leh rintlak an nih thin thu a sawi.

School Education Minister chuan Sawrkar hnuai a hna lakna ah a thiam leh phu te chuah lak an nih tur thu sawiin Samagra Shiksha hnuai a mi 161 lakna tur ah pawh Written Exam bak ah an thiamnate a tak a an hman chhuah thiam leh thiam loh endik nan ‘Demo-Teaching’ neih tur a ruahman a nih thu a sawi a. Khawi hmun atang pawhin duhsakna lan tir tur a lehkha ziak a awm a nih pawhin awmzia a awm loh tur thu a sawi bawk a ni. Dr. Vanlalthlana chuan tun a Sawrkar hna lak chungchang a kalphung thar hmanna hian nakin zel ah mi taima, tumruh, a thiam leh phu te chauh in hlawhtlinna an chan theih nana kawng sial lawkna a nih thu a tarlang bawk a ni.

Dr. Vanlalthlana, Minister hova inkawm hona hun hi Pi Ngurhmingliani Chinzah, Principal, DIET-in kaihruaiin DIET, Lawngtlaia thawktu indaih lohna leh building thawmthat ngaite sawi ho a ni a. Govt. Region Higher Secondary School leh High School, Samagra Shiksha leh District Education Office-te a tlawh bawk a ni. Zirna in tichangtlung turin mahni remchan dan a, mimal leh pawl anga luan chhuahna tur, Sawrkar laipuiin Vidhyanjali a duan chu Minister chuan inziaklut tur leh hemi kawng a tlem tal pawh a tha thawhtu ni theuh turin kalkhawmte a sawm bawk a ni.