3685/2023-2024

Dated Serchhip, the 6th February, 2024: Serchhip District atana Electoral Roll Observer Pi K.Lalrinzuali hovin vawiin khan Serchhip DC Meeting Hall-ah meeting neih a ni.

Serchhip District chhungah Assembly Constituency pathum 26-Serchhip, 27-Tuikum leh 28-Hrangturzo Constituency a awm a. Special Summary Revision of Electoral Roll 2024 neih niin qualifying date ath 1.1.2024 hman a ni a. Vawiin meeting-ah hian Roll dik leh felfai a awm theih nan Observer chuan ERO te leh AERO te hmalakna enpuiin political party, khawtlang hruaitute leh tlawmngai pawlte meeting-a neih pui a ni.

Pi K.Lalrinzuali chuan Electoral Roll dik leh felfai nei turin mitinin mawh kan phur a, a bik takin sawrkar thawhpuitu khawtlang hruaitute, political party leh tlawmngai pawlte an pawimawh hle, a ti a. India khua leh tui dik tak te chauh roll-ah an awm tur a ni a; fimkhur takin, e-roll a thun turte uluk takin kan endik thin tur a ni, a ti. Electoral Roll Observer chuan E-Roll dik leh felfai siam a nih theihna tura rawtna leh thurawn pe duh an awm a nih chuan englai pawhin a inhawn reng thu a sawi a. Inthlanna fel leh fai, Electoral Roll dik leh rintlak a awm theih nan official te thawhpui zel turin tlawmngai pawlte leh political party te a sawm a ni.

Serchhip District chhung AC pathumah e-roll a inthunthar duh te dilna Form 6 chu 260 a lut a, 22 hnawl a ni a. Hming paih tura dilna Form 7 hi 280 lutin 27 hnawl an ni a. Form 8 (correction) 183 ah 1 hnawl a ni a, Form 8 Shifting (Outside AC) ah 69, Form 8 Shifting (Within AC) ah 33 dawn niin pawm vek a ni. E-roll publication hi February ni 8, 2024 hian neih a ni ang.

Vawiin meeting hi Serchhip District -a Election Officer (EO) Pi Rebecca Laldinmawii Hrahsel chuan a kaihhruai a. Sawrkar official te bakah YMA, MUP, MHIP leh  political party hrang hrang aiawh te an tel a ni.