Vawiin chawhma dar 11 khan DC Meeting Room Serchhip-ah District Level NLUP Committee chu an Chairman Dr. Lalrozama, IAS District Bawrhsap hovin an thukhawm.

Dr. Lalrozama, IAS, District Bawrhsap kaihhruai he thutkhawmah hian Serchhip District chhunga NLUP hmalakna leh lo kalpui tawh dante thlir let a niin hmalak zel dan turte sawi a ni a. Pu L. Rinliana, SDO (S) Nodal Officer NLUP chuan hmalakna tlangpui sawiin, NLUP sawrkar flagship Programme hi ni 14th January, 2011 atangin Serchhip District-ah kalpui tana a ni a, District dangte aia hlawhtlinpui ber District ni thei tura chak taka hma lak mek zel a ni a ti a. Agriculture Department hnuaia NLUP tanpuina dawngtu, chhungkaw 10 te chu an trade thlanah hmalakna mumal hmuh tur a awm loh avangin Show Cause Notice pek ni tawhin, an intiamkamna angin an pawisa dawn tawh te pawh rul let tura hmalak a ni a, Soil & Water Conservation Department hnuaia chhungkaw 13 te pawh Show cause notice pek an nih tawh thu a sawi. Line Department hrang hrangten an hnuaia tanpuina dawngtute hnathawh dan an enfiah sak thin a, a tul anga hmalak chhunzawm zel niin chhungkaw tam tak chuan NLUP hi malsawmna hnar a ni tih hriain nasa takin hma an la a, a hlawhtlinna rah an seng mek thu a sawi a ni.

NLUP 1st Phase leh 2nd Phase chu sem zawh thawkhat tawh niin, tunah hian 3rd Phase leh 4th Phase hi sem chhuah mai tura hmalak mek a ni a, 3rd Phase ah hian Serchhip Assembly Constituency huam chhungah beneficiary 725 awmin, Tuikum Assembly Constituency chhungah beneficiary 687, Hrangturzo Assembly Constituency ah beneficiary 702 pek tum an ni a, 4th Phase ah hian Serchhip Assembly Constituency ah beneficiary 419, Tuikum Assembly Constituency ah beneficiary 367 leh Hrangturzo Assembly Constituency ah beneficiary 462 te hnenah NLUP tanpuina hi pek tum a nih thu a sawi bawk a ni.

Line Department hrang hrang atangin NLUP tanpuina an sem chhuah leh hmalak dante ngaihthlak niin Department thenkhatin 3rd Phase leh 4th Phase tanpuina chu thawh khatna an sem chhuak tawh a, chutih ruala tanpuina sum sem tur Department hranga hranga rualkhaia taka an hmu thei lo chuan hmalakna a ti khaihlak nia an hriat thu an sawi a, hmalakna kal mekte a hmuna endik hna thawh kawngah pawh sum lam harsatna a awm thin avanga duhthusama hma lak a harsat thu Department hotute hian an sawi bawk a ni.

Meeting kaihruaitu Dr. Lalrozama, District Bawrhsap chuan tanpuina sum dawngtu hma la tha duh lote chungah a tul anga hma lak zel a nih tur thu sawiin, hemi chungchangah hian khawtlang hruaitute, Village Level NLUP Committee ten tha taka an tawiawm a tul thu sawiin thawhpuiah a sawm a, harsatna an tawh mekte chu thuneitu sang zawk lama thlen tura hma lak anih tur thu a sawi bawk a ni.

Vawiinah hian District Level NLUP Implementing & Monitoring Committee memberte bakah Line Department hrang hrang aiawhte an kal tha hle a ni.