Vawiin khan UD&PA Minister Pu Zodintluanga pisaah Smart City atana ruahmanna enho a ni.

Smart City Mission hnuaiah sawrkar laipui chuan India ram pumah hmalakna tur khawpui 100 a thlang chhuak a, chung zingah chuan Aizawl khawpui chu thlan ni in tehna kawng hrang hrang a siam zinga hmasa ber, stage 1 chu Aizawl hian a paltlang tawh a. A kailawn pahnihna kai turin khawpui thlanchhuahte hi ruahmanna (proposal) siamah an inel leh dawn a. Hmalak hmasakna tur Proposal nei tha khawpui 20 thlanchhuah zingah Aizawl khawpui a tel ve ngei theih nan Urban Development & Poverty Alleviation Department chuan chak takin hma a la mek a ni.

Sawrkar laipui Ministry of Urban Development (MoUD) pawmpui Arkitechno Firm chuan Smart City - Aizawl Proposal an siam chu vawiin khan UD&PA Minister Pu Zodintluanga, UD&PA Secretary Pu C.Vanlalramsanga leh officer dangte hmaah powerpoint presentation hmangin an hrilhfiah a. He proposal an siam hi Minister hian a thuphunga pawmsakin belh leh paih ngai te tihfel a nih hnuah sawrkar laipuiah thawn thlak a ni ang. Area Based Proposal an siam mekah hian duhthlan tur pathum awmin chung zinga pahnih - retrofitting leh greenfield development te chu Aizawl nena inrem bera tura ngaih a ni. Retrofitting-ah hian khawpui ruhrel awmsa tichhe lova thawmthat leh cheimawi a ni ang a, greenfield development-ah chuan ram ruakah ruhrel thar hlak din tur a ni thung.

UD&PA hian Aizawl Smart City atana hmalakna thui tak a kalpui tawh a. Sawrkar laipuiin kaihhruaina a siam zinga engemawzat an tihlawhtling tawh a ni. Tarlan tawh angin Stage 1 an paltlang tawh a, stage 2 atana tihtur hrang hrang zingah MoUD pawmpui firm thlanchhuah te, mipui ngaihdan lak nana essay competition siam te, facebook-a Smart City Aizawl page siam te, twitter account siam te, UD&PA Minister hova thuthar thehdarhtute kawm te, inrawnkhawmna buatsaih te, smart city website siam te, YouTube account siam te, Mygov.in a smart solution tarlan te, concept drawing competition buatsaih te, logo design competition buatsaih te, stakeholders meeting neih te chu UD&PA Department hian a lo tihlawhtling tawh a ni. Smart City chungchanga mipui ngaihdan thawh tura sawmna banner chu Aizawl khawpui chhung hmun hrang hrangah tar a ni a, tlawmngai pawlte nena thawhhona turin hma lak mek a ni bawk.