Vawiin chawhma dar 11:00 khan Serchhip DC Meeting Room- ah Serchhip District NLUP Committee chu an Chairman Pi Juhi Mukherjee, IAS hovin Serchhip DC Committee Room-ah an thukhawm a, NLUP 3rd & 4th Phase Beneficiary Final List an thlirho.

DLNC Chairman Pi Juhi Mukherjee, IAS chuan NLUP kalphung thar “One Crop, One Village” chu a theih chinah uluk taka kalpui tum anih thu sawiin, a hma a beneficiary thenkhat an trade lo thlang fel tawh “One Crop, One Village” in an Trade a huam tel si loh, hma thui tak lo la tawh an awm nual tih report an dawn thu te, heng mite hi an hma lo lak tawh dan enfiah sak anih hnu ah an hmalak dan azirin ngaihnathiam tur an nih leh nih loh thutlukna siam anih tur thu a sawi. Vawiin DLNC Meeting-ah hian NLUP tanpuina dawngtur list a awm nawn (double entry) an awm leh awmloh uluk taka endik leh anih tur thu te, chhungkaw khata beneficiary pahnih awm emaw, Sawrkar hnathawk awmna chhungkua a beneficiary an awm leh awmloh te uluk taka endik leh vek anih dawn thu sawilan a ni a, Bawrhsap chuan DLNC member te leh Line Department Official te chu hetiang thil felhlel an hmuchhuak anih chuan a rang thei ang bera amah hriattir turin a chah a ni.

NLUP hlawhtlinna tura Village-Level NLUP Committee te rinawm leh fimkhur a pawimawhzia sawilan niin monitoring chungchangah Line Department te nen dik taka thawhho a pawimawhzia sawilan a ni a, District Information & Public Relations Officer chu District NLUP Media Officer atan ruat an nih thu leh NLUP beneficiary te hnathawh dan endik hna an thawh ve tawh dawn thu te, chanchinbumi te nen tang hova Video leh Still thlalak te nen document felfai taka an siam thin dawn thu sawilan a ni bawk.

Serchhip District chhunga NLUP Cluster pathumah NLUP 3rd Phase atan beneficiary 2072 (Serchhip- 690, Tuikum-678, Hrangturzo-704) leh 4th Phase atan beneficiary 1237 (Serchhip- 406, Tuikum-362, Hrangturzo-469) thlan chhuah an ni.