May ni 27 leh 28, 2014 khan Mizo lemziak thiam pathum – Pu Lalbiaklara, Pu Lalbuta leh Pu V. Lalzawmkima te chuan Spain khawpui, Madrid-a France ram palai hotulu Ambassador of France in Spain Compound chhungah Group Exhibition an nei a. Heng lemziak thiam pathum te hi Spain ramah Embassy of France sawmna leh I & PR Department leh Mizoram Art Development Society te puihnain an kal a ni.

He group exhibition hi French Embassy-a thawk Pu Danny Lalrinsanga huaihawtin kum 2012 atang khan ruahmanna kalpui tan a ni a, kumin May thlaah a taka tihpuitlin a ni ta a. May ni 12,2014 ah Madrid an thleng a, May ni 30 khan Aizawl an lo let leh a ni. Spain ramah an cham chungin Spain-a Embassy of France chuan tha takin an lo mikhual a ni.

Ambassador compound chhunga Exhibition nei tur a nih avangin France Foreign Ministry atanga phalna nghah a ngai a, chuvang chuan Exhibition hun pawh a khaw tlai tak deuh thu lemziak thiam te hian an sawi.

Exhibition sawmna hi Spain ramah Embassy of France-in an hmingin an thawn chhuak a, mi pawimawh tak tak leh Art lama mi rilte sawm an ni hlawm a. Painting-te chu thingkungah tarin en rem tura tlar a, painting nena inmil tur Mizo thil, Thul, Em, Thihna, Darkhuang, Saum bur leh a dangte pholan tel a nih hian painting a chawimawi hle. Heng Mizo thilte Exhibition huaihawttu Pu Danny-a khawnkhawm sate an ni. Group Exhibition-ah hian Painting exhibit 44 leh tarmawi (wall hanging) 20 vel phochhuah a ni.

Exhibition tlawhtute hi Spain Lal chhungkua atang te, ram hrang hrang palai Ambassador-te, Madrid khawpuia Art Gallery hrang hranga Art Director-te, Interior designer leh mi pawimawh tak tak an ni hlawm a, Spain Lal chhungkua leh mi dang engemaw zatin painting an lei a, Pu Danny-a leh Spain rama awm mek Pi Sangpuii, d/o Pu Lalkhama, IAS (Rtd) ten painting awmzia an hrilhfiah zel a, a vaiin hian Painting 12 leh khaimawi 5 an hralh a ni.

Lemziak thiam pathum te hian he Exhibition an neih theihna tura ruahmanna siamsaktu Pu Danny Lalrinsanga leh Ambassador Pu Jerome Bonafont chungah leh sum leh paia tanpuitu I & PR Department, Aizawl leh MADS chungah lawmthu an sawi a ni.

He group exhibition hi Mizo lemziak miten an lemziah te India ram pawn a an pho chhuah hmasa ber a ni.