Serchhip District pumpui tana NLUP Workshop ni hnih awh tur chu vawiin khan Serchhip DC Conference Hall ah neih tan a ni a, bialtu Chief Minister Pu Lal Thanhawla'n a hmanpui. Workshop tan hma hian DC Office kawta line department hrang hrangte hmalak dante pholanna NLUP Exhibition buatsaih chu Chief Minister chuan a hawng a, Agriculture Department-in a neih thar lei enfiahna Mobile Soil Testing Laboratory Bus chu a tlawh bawk.

DC Conference Hall-a Workshop hi DC Pu H.Darzika'n a kaihruaia, Khuallian Chief Minister chuan mahni hna tul tak kalsana Workshop hmang tura lo kal te chungah lawmthu hrilhin an sorkar hmasak laia NLUP dawngtu, dik tak leh taima taka thawktu te chuan an dinchhuahpui laiin chutianga thawk lo erawh chu an hlawhchham thu a tarlang a. NLUP chu sorkar laipuia mithiam rual te pawhin tha an tih thu leh India rama Kristian state awm chhun Mizoram ah enchhin a, an hlawhtlinpui chuan ram puma state dangte hman ve tura an ruahman thu a sawifiah a, India ram pum hmuh leh entawntlak tura kan hlawhtlinpui ngei a pawimawh hle a ni, a ti. Mizo te zingah kut tling lova sum lakluh hreh lo kan tam ta leh sum ngainatnaa kan lut nasa lutuk chu veiawm tiin Pu Lal Thanhawla chuan Kristian kan nih ang taka Pathian duh dan anga kan nun a tul tak zet a ni, a ti. Sorkar chuan retheite dawmkan chu thupui ah a nei reng dawn a ni tiin anmahni chhawmdawl nana eizawnna hmanrua a pekte pawh thenkhat chuan an lo hralh ru duh zel a, hrema man te an ngai leh thin chu a pawi tak zet a ni, a ti. NLUP pawh miretheite chhanchhuah nana hmalakna a nih laiin a dawngtu mi rinawm lo te chuan Jail bang zut nan an hmang mai ang tih a hlauhthawn thu a sawi lang bawk. Rinawmna, taimakna leh dikna nena kan thawh phawt chuan hlawhtlinpui ngei tur a ni a, hnam pawh chimralin kan awm lo ang, a ti bawk.

NLUP Nodal Minister Pu H.Liansailova, Khual Zahawm chuan rethei te dawmkan nana Mizoram Budget-a sum tam tak - budget pumpui sawma pakhat aia tam dah a ni chu sorkarin rethei/harsa te dawmkan a ngaihpawimawhzia tarlangtu a ni, a ti a. An sorkar hmasak tuma NLUP sawiselna te chu anmahni titangtu a nih thu a sawi lang bawk. Eng that loh deuh laia mombati sorkar ti-a sawisel fo chu thu dik lo tiin tuna Mizorama power siam chhuah 30MW vel zinga a tam zawk chu an sorkar hmasak tuma an siam vek a nih thu a sawifiah bawk. Tuirial Power Project pawh tunah thawh mek niin reilote ah Mizoram chuan power tam zawk a nei dawn a, NLUP pawh power-ah a innghah dawn avangin kawngro a su hle dawn a ni, a ti. NLUP hlawhtlinna tur chu taimakna, rinawmna leh tih tak zetna ah a ni tiin Serchhip district atang chuan hlawhtlinna a lo lang ang a, midangte tana entawn tur in siam kan beisei tlat dawn a ni, a ti bawk. Workshop hmanpuitu Health Minister Pu Lalrinliana Sailo chuan NLUP chu inbuatsaih uluk lova dawn mai chi a ni lo tiin rinawm taka thawka dinchhuahpui nana hman tum theuh turin a fuih a, department hotute chu dik taka kalpui tlat turin a chah bawk.

NLUP Implementing Board Chairman Pu R.Selthuama chuan NLUP chu a hmaa mi aiin a scheme a tha zawk a, sum pawh a tam zawk a, thawktu te pawh an thiam zawk tawh a ni tiin a hlawhtlinna tam zawk chu a dawngtu ah a innghat dawn a ni, a ti. India ram pumin Mizoram chu a thlir avangin kawng sattu ni tura inbuatsaih theuh turin kalkhawmte chu a fuih bawk.

Vawiina NLUP Workshop hmang tur hian Aizawl lam atangin Agriculture Secretary Pu Vanengmawia leh Horticulture Secretary Pu T.Sangkunga te bakah line department hotute an kal tha hle a, NLUP Implementing Board Vice Chairman Pu P.L.Thanga chuan NLUP kalphung leh thawh dan turte power point presentation hmangin a sawifiah bawk. Vawiina Serchhipa NLUP Workshop hi Aizawl District pawna hman tawp ber tur a ni a, District dangah chuan hetiang programme hi hman zawh vek tawh a ni. Serchhip District khaw hrang hrang atangin khawtlang hruaitute an kal tha hle a, naktukah programme hi hman chhunzawm a ni ang.