YMA Platinum Jubilee puala Lengkhawm Zai Intihsiak kharna leh lawmman semna chu vawiin khan Pu R. Lalngheta CYMA Treasurer i/c Cultural Sub-Committee kaihhruaiin Vanapa Hall-ah hman a ni a, Art & Culture Minister Pu PC Zoram Sangliana'n a hmanpui.

Lengkhawm Zai Intihsiak kharna hunah hian Pu PC Zoram Sangliana chuan thu sawiin lengkhawm hla te hi lusun fate hnem nana Pathianin hmanraw min pek hlu tak a ni a ti a, Mizote inlungrualna ber leh tui tlanna ber chu zai hi a ni tiin a sawi. Hmasawnna lian leh ropui tak takte hian a hmang pha ve lo tan chuan tangkaina a nei vak lo a; kan hnam hlate hi chu kan hnam rohlu an ni a, hmun tinrengah Mizo fate'n kan hmang tangkai em em a, heng aia inrochun tur tha hi Mizote'n kan nei chuang lo a ni a ti bawk. Pu Zoram Sangliana chuan YMA member te chu khawhar hla hriat tam leh thiam tamah inel sela khawtlang tan leh khawhar chhungte tan malsawmna an nih ngei a rin thu a sawi a. Hnam rohlu chhawm nun zel nana CYMA hmalakna chuan Mizo thalaiteah rah tha chhuah zel se a duh tih a sawi bawk.

CYMA leh Art & Culture department te buatsaih YMA Platinum Jubilee puala Lengkhawm Zai Intihsiakah hian hla pathum (3) - "An va hlu em thil nung tinreng", "Edenhlui hi ka hnuchhawn ram a ni" leh "Hnam ka len nuam mang e" tih hla te hmangin intihsiak a ni a. YMA branch 41 atangin member 1828 lai he intihsiakah hian an tel a. Hetiang hi lawmman dawngtute chu an ni:

1-na    Ramthar Veng Branch        Trophy + Certificate + Rs. 20,000
2-na    Ramhlun South Branch        Certificate + Rs. 15,000
3-na    Tuikual North Branch        Certificate + Rs. 10,000
4-na    Tuithiang Branch            Certificate + Rs. 5,000
5-na    Bungkawn Branch            Certificate + Rs. 5,000
6-na    Chawnpui Branch            Certificate + Rs. 5,000
7-na    Rawpuichhip Branch            Certificate + Rs. 5,000
8-na    Tuikual South Branch        Certificate + Rs. 5,000
9-na    Chhinga Veng Branch        Certificate + Rs. 5,000
10-na    Edenthar Branch            Certificate + Rs. 5,000

Member kal tam lawmman hi chi hnih siam a ni a, Member kal tam ber lawmman chu Tuikual North Branch-in an la a, member 105 an kal a ni. Percentage-a laka kal tam ber chu Tuivamit Branch an ni a, member 436 awmin intihsiakah hiam member 76 (17.43%) an kal a ni. Member kal tam ber branch te hian lawmmanah Certificate leh Rs. 1500 an dawng.

Hla hril thiam ber lawmman chu Ruthi Lalrinawmi, Tlangnuam Branch-in a dawng a. Khuangpu thiam ber lawmman chu Lalrinzuala leh Lalruatfela Sailo, Tuithiang Branch te'n an dawng a ni. Mimala lawmman dawngtute hian Certificate leh Rs. 500 an dawng a ni.