No.2635/2021-2022
Aizawl the 18th October, 2021: Vawiin khan Serchhip DC Conference Hall ah District Sanitation Task Force te chu an Chairman Pu Kumar Abhishek, IAS hovin an thukhawm a, Mizoram khawpui fai inelna, 2021 kal meka hmalak dan turte an ngaihtuah.

Pu Kumar Abhishek chuan, khawpui fai inelna endiktuten December thla velah min en dik turah kan ngai a, hmalakna hrang hrang awmte thawh nan thla khat vel hun la nei ang kan ni. Hemi chhung hian mawhphurhna neitu zawng zawng theihtawp chhuah theuh kan tum ang a. Mipuite pawhin theihtawp chhuaha faina lamah hma kan lak a pawimawh hle dawn a ni, a ti.

Mizoram Khawpui Fai Inelna, 2021 hi October thla tir atanga kalpui tan kha niin District Capital inelna te, Notified Town fai inelna te a awm dawn a. He inelna endik dan tur chi hrang hrang te chu vawiin hian uluk taka zirho a ni a. A taka kalpui dan turte uluk taka sawiho nghal zel niin mawhphurtu turte pawh a theih chen chen inruat nghal a ni.

Vawiin meeting ah hian Pu Lalmuansanga Ralte, Addl. DC te, Pu Amol Srivastava, IAS, SDO, Thenzawl te leh member dangte an kal tha hle a ni.