Vawiin hian Serchhip District Sanitation Task Force chu an Chairman Pi Sangchhin Chinzah, Serchhip Bawrhsap ni bawk hovin a Office chamber-ah an thukhawm a. Serchhip khawpui leh District chhunga census town dangte chu Preliminary Open Defecation Free khuaah an puang a. Central lam atanga endiktuten an rawn endik fel hnuah Serchhip District pumpui ODF District ah puan a ni tawh ang.

Pi Sangchhin Chinzah chuan, Serchhip a hna a thawh tirh atangin Open Defecation Free chu a hna ngaihpawimawh leh thawh hmasak a nih thu sawiin Mizoram mipuiten faina leh thianghlimna kan mamawhna a vei thin thu a sawi a. Serchhip khaw chhungah phei chuan engkim a nih tur ang thlapin, kawng tinrenga finfiah ngam, Sanitised Latrine dik tak vek kan hmang ngei tur a ni, tiin hmalak mek dan leh tuna hna kal lai mek thawh dan a sawi a. Faina lama inzirtirna uar turin sawrkar hnathawk, tlawmngaipawl, kohhran leh khawtlang hruaitute a ngen bawk.

Vawiina meeting hian Serchhip District chhunga Urban Area te Preliminary Declaration a neih bakah hian khaw chhung tihfai hna thawh chhunzawm dan tur te, State task Force atanga hmalakna tur ruahmanna lokal umzui dan turte an rel bawk a. Tin, Serchhip khaw chhunga bawlhhlawh paih motor zing zawka a tlan kual theih dan tur ruahmanna te pawh member te hian an sawi bakah, faina inzirtirna lama nasa zawka hmalak dan turte an sawi a ni.

Census town te Open Defection Free a puan dan tur ruahmanna (ODF Declaration Protocols) ah chuan, Census town a Ward tinten Self Declaration an nei phawt ang a, chumi hnuah District Task Force in Preliminary Declaration an nei leh anga  State Task Force hnenah thlen nghal ang. Ni 15 chhung sawisel duh neite tana sawisel theihna hun hawn a ni nghal ang.  State level hian Central lam thuneitute hnenah an thlen ve thung ang a, ni 30 chhungin Central lam atanga endiktuten an duh anga an rawn endik leh vek hnuah tlinga an pawm chuan ODF ah khawpui hi puan theih chauh a ni. District chhung thingtlang lam (Gramin) erawh chu khawtinin ODF ah an inpuang vek tawhin District Level Committee pawhin an endik vek tawh a, tunah hian State Level endik hun ngaihchan mek niin, State Level endiktuten tlinga an ngaih chuan final Declaration neih theih a ni thung dawn a ni.

Attachment

  • Loading attachment...