I&PR Department-in Mzorama Film producer-te leh Film siam tuimi te tana a buatsaih ‘Workshop on Documentary Films’ chu vawiin khan I&PR Conference Hall-ah neih a ni a, a hawnna inkhawm hi I&PR Director Pi Lalnithangi chuan khuallian niin a hmanpui a ni. 

Pi Lalnithangi chuan  I&PR Department leh Mizoram Film Development Society (MFDS) ten thawhhona tha tak an nei chu lawmawm a tih thu a sawi a. Film chu thil ti thei tak leh chak tak, mihring nun leh hawiher tidanglam theitu a ni, a ti a.  Tangkai leh mumal zawka Film siam a tul thu sawiin hnam ziarang te, rinna leh nunphung te midang hnena pholanga, nundan mawi leh tha inzirtirna hmanraw tangkai tak a nih theih thu a sawi. I&PR Director chuan tun dinhmunah Mizoramin Film theatre tha, film release theihna tur emaw Film Festival thleng thei tur khawpa tha hmunhma nei rih lo mahse, nakin lawkah chuan hmunhma leh hmanraw tha zawk neih a nih theih nan hmalak mek a nih thu a sawi a. Film siam lama tuimi kalkhawmte chu rilru leh ngaihtuahna senga tan la sauh sauh turin a chah a, tha taka workshop neia hlawkpui nana hmang theuh turin duhsakna a hlan nghal a ni. 

Training hawnna hun hi I&PR Jt. Director Pi Lallianpuii, Nodal Officer, Film Development in a kaihruai a. Pu Lalsawmliana Pachuau, Patron, Mizoram Film Development Society (MFDS) chu Resource Person niin Documentary Film siam dan leh hemi chungchanga hriat tur tulte zirtirna leh hrilhhriatna a nei a. Workshop-ah hian Film siam lama tui mi leh I&PR lama thawktute an tel a ni.