Vawiin khan Aijal Club Reception Hall-ah Mizoram Remote Sensing Application Centre (MIRSAC) leh Environmental Systems Research Institute (ESRI) India tangkawp buatsaihin Global Information System (GIS) chungchang zirhona neih a ni a. Planning Minister Pu Lalsawta chu khuallian a ni.
Pu Lalsawta chuan tunlai khawvel thang chak tak, thiamna nasa taka pung mek hunlaia chengte kan vannei a, hmanlai mite neih ve loh remchanna tam tak kan neih hi hman tangkai kan zir a tul a ni, a ti. GIS chu a hmang thiam apiang tana chhawr nahawm, kawng tinrenga hman tangkai theih; dan leh thu pek kenkawhna kawng a ni emaw, hriselna, zirna, industries leh thil dang tam takah ruahmanna kim chang leh felfai siam zung zung theihna tura thil tangkai a ni, a ti a. Mizoram sawrkar department hrang hrang aiawh GIS tangkaina zir tura kalkhawm ten taima taka zira, Mizoram tana thil tha an puak chhuah ngei a beisei thu Planning Minister Pu Lalsawta chuan a sawi a ni.
ESRI India Sr.Vice President Asheet Makhija pawhin thu sawiin GIS nihphung leh tangkai dan chipchiar a sawi a. Leilung leh a tuamtu zirchianna leh chhuizauna, lehkhabu leh map keu kher ngai lova IT thiamna hmanga awlsam taka information duh ang apiang lak chhuah theihna a ni, a ti a. GIS hmang hian sawrkar hmalaknah ruahmanna tha zawk siam turin a pui thei a, a hmangtuten GIS a information awmsa an hman dan a zirin chhiat rupna lo thleng thulah te, khawpui chei kawngah te, zirna kawngah te, inbiakpawhna leh inkalpawhna tha zawk siam kawngah te a pui thei niin ESRI Sr.Vice President chuan a sawi.
Mizoramah hian ESRI nena thawk hovin GIS hmang tu engemawzat an awm a, chung zingah chuan Aizawl Municipal Corporation, Mizoram University, MIRSAC, Environment Forests & Climate Change Department, Revenue leh a dangte an tel. ESRI hi California, USA a din niin khawvela GIS software market-ah za zela 40 chuang an hum a ni.
‘Harnessing the True Value of GIS’ tih thupui hmanga seminar hi MIRSAC Member Secretary leh Chief Scientific Officer ni bawk Dr. R.K.Lallianthanga’n a kaihruai a. ESRI Technology Architect Krishna Rao, Shantanu Dutta leh Vibhu Sinha ten powerpoint hmangin GIS hnathawh dan an sawi zau a ni.
