Central sorkarin district tina hmang tura atih angin, nizan dar 6 khan Serchhip Distrit chhunga hman tur, ‘Swachchata Utsav’, Sanitation Festival chu Chief Minister Pu Lal Thanhawla chuan Serchhip Bazar Kawn ah a hawng.

Chief Minister chuan Mizo te hian nasa taka than kan duh anih chuan kan rilru leh ngaihtuahna te a thianghlim hmasak a tul a ni a ti a. Chumi nei thei tur chuan kan taksa te, kan in leh a chhehvelte, kan thawmhnaw leh bungbelte, kan khawtlangte a fai tur a ni a ti. Kan Pathianin ‘In thianghlim tur a ni, kei ka thianghlim si a’, atih hi zawm thei tur chuan rinawmnate, taimaknate, chhelnate, leh Amah tihnate kan neih a tul a ni a ti a. Serchhip district hi khawvela a ber kan nihna, cancer vei tamna ber kan ni hi kan thianghlim tawklo hle a ni tih a chiang a, chuvangin taksa leh rilru thianghlimna lamah nasa taka tan kan lak angai a ni a ti.

Faina Kutpui hawnna hi musical concert neia lawm a ni a. A buatsaihtu department hotu Er. Lalfanliana, Engineer-in-Chief, PHE Department in thutawi sawi bawkin Sanitation Festival hi ram puma hman mek, Total Sanitation Campaign tih chak nana central sorkar ruahmanna a nih thu a sawi a. A tum ber chu thingtlang mi, abikin BPL chhungkua te leh aganwadi centre a inthiarna hmun thianghlim an neih theih nante, vantlang tan sanitary complex siam leh bawlhhlawh paihna siam leh thil dang tam tak te a ni a ti.

Zaithiam concert-a telte hnenah Chief Minister hian duhsakna thilhlan a pe a ni.

Hawnna inkhawmah hian Chief Minister tawiawmtu a nupui Pi Lal Riliani bakah Pu P.C.Lalthanliana, Minister of State for LAD, Pu Joseph Lalhimpuia, Vice Chairman,Lunglei HPC leh Dr. Diraj Kaur, IAS, Special Secretary, PHED, Pu Nikhil Kumar, IAS, Special Secretary, Trade & Commerce, Pu O.N. Bhashkar, IPS, Dy Director, SIB leh Pu P.Lalchhuanga, DC, Serchhip te an tel a ni.

Attachment

  • Loading attachment...